മലയാളത്തിലെ പല സംവിധായകരും കാമറയ്ക്ക് പിന്നില്‍ നിന്നും മുന്നിലേക്ക് രംഗപ്രവേശം ചെയ്തു വരികയാണ്. ഇവരുടെ ഇടയിലേക്ക് സജി സുരേന്ദ്രനും എത്തുന്നു. ഇവര്‍ വിവാഹിതരായാല്‍ എന്ന ചിത്രത്തിലൂടെ പ്രേക്ഷകരുടെ മനസ് കീഴടക്കിയ സംവിധായകന്‍ സജി സുരേന്ദ്രനാണ് അടുത്തതായി അഭിനേതാവാകുന്നത്. വി.എസ് ജയകൃഷണന്‍ സംവിധാനം ചെയ്യുന്ന അന്യര്‍ക്ക് പ്രവേശനമില്ല എന്നാണ് ചിത്രത്തിലാണ് സജി സുരേന്ദ്രന്‍ തന്റെ അഭിനയമികവ് തെളിയിക്കുന്നത്.
സിനിമയ്ക്കുള്ളിലെ സിനിമയുടെ കഥ പറയുന്ന ചിത്രത്തില്‍ ഒരു സംവിധായകന്റെ വേഷമാണ് സജിക്ക്. ടിനി ടോമും ചിത്രത്തില്‍ വളരെ പ്രാധാന്യമുള്ള ഒരു വേഷം അവതരിപ്പിക്കുന്നുണ്ട്. സിനിമയില്‍ സജി സംവിധാനം ചെയ്യുന്ന ചിത്രത്തില്‍ പ്രവര്‍ത്തിക്കുന്ന ഡബ്ബിംഗ് ആര്‍ട്ടിസ്റ്റിന്റെ വേഷമാണ് ടിനി ടോം അവതരിപ്പിക്കുന്നത്. രണ്ട് പേരുടെ ജീവിതത്തിനിടയ്ക്ക് മൂന്നാമതൊരാള്‍ എത്തുമ്പോള്‍ ഉണ്ടാകുന്ന പ്രശ്‌നങ്ങളെ ചുറ്റിപ്പറ്റിയാണ് ചിത്രം മുന്നോട്ട് പോകുന്നത്.
അതേ സമയം കാവ്യ മാധവന്‍, അന്‍സിബ ഹസന്‍ എന്നിവര്‍ കേന്ദ്ര കഥാപാത്രങ്ങളായെത്തുന്ന ഷീ ടാക്‌സി എന്ന തന്റെ ചിത്രത്തിന്റെ ഷൂട്ടിംഗ് സജി പൂര്‍ത്തീകരിച്ചു. ചിത്രത്തിന് വേണ്ടി നടനും തിരക്കഥാകൃത്തുമായ അനൂപ് മേനോന്‍ ഒരു ഗാനം എഴുതുന്നുണ്ട്.
