തിരുവനന്തപുരം: തദ്ദേശ തെരഞ്ഞെടുപ്പിലെ ജനവിധി അറിയാന്‍ ഇനി മണിക്കൂറുകള്‍ മാത്രം ശേഷിക്കെ ആത്മവിശ്വാത്തെക്കാള്‍ ആശങ്കയിലാണ് രാഷ്ട്രീയ കേരളം.
നിയമസഭാ തിരഞ്ഞെടുപ്പിനു മുന്‍പുള്ള സെമി ഫൈനല്‍ എന്നു വിശേഷിപ്പിക്കാവുന്ന തദ്ദേശ തിരഞ്ഞടുപ്പു ഫലം ഉച്ചയോടെ പൂര്‍ത്തിയാകുമെന്നാണു കണക്കുകൂട്ടല്‍. രാവിലെ എട്ടിനാണ് 244 കേന്ദ്രങ്ങളിലും വോട്ടെണ്ണല്‍ ആരംഭിക്കുക.
ആദ്യം തപാല്‍ വോട്ടുകളാണ് എണ്ണുന്നത്. തുടര്‍ന്ന് ഇലക്‌ട്രോണിക് വോട്ടിംഗ് യന്ത്രത്തിലെ വോട്ടുകള്‍ എണ്ണിത്തുടങ്ങും. ഓരോ തദ്ദേശ സ്ഥാപനത്തിന്റെയും ഒന്നു മുതല്‍ ക്രമത്തിലുള്ള വാര്‍ഡുകളിലെ വോട്ടാണ് എണ്ണുന്നത്.
എട്ടരയോടെ ആദ്യഫലങ്ങള്‍ പുറത്തുവരും. ഒരു ബൂത്ത് മാത്രമുള്ള നഗരസഭാ ഡിവിഷനുകളുടെയും പഞ്ചായത്ത് വാര്‍ഡുകളുടെയും ഫലമാണ് ആദ്യം പുറത്തുവരിക. ലീഡ് നില സെക്കന്‍ഡുകളുടെ ഇടവേളകളില്‍ അറിയാന്‍ കഴിയുന്ന സംവിധാനവും തെരഞ്ഞെടുപ്പു കമ്മിഷന്‍ ഒരുക്കിയിട്ടുണ്ട്.
