പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന പുലിമുരുകന്റെ ടീസര്‍ മെയ് 21ന് പുറത്തിറങ്ങും. മോഹന്‍ലാലിന്റെ പിറന്നാള്‍ സമ്മാനമായാകും ടീസര്‍ എത്തുക.
മുരുകന്‍ എന്ന കഥാപാത്രത്തിന്റെ കാരക്ടര്‍ ഇന്‍ട്രോ ആണ് ടീസര്‍. മോഹന്‍ലാല്‍ എന്ന നടനെയല്ല മുരുകനെ ആയിരിക്കും ഈ സിനിമയില്‍ ഉടനീളം നിങ്ങള്‍ കാണുക. വൈശാഖ് മനോരമ ഓണ്‍ലൈനോട് വ്യക്തമാക്കി.
ഒരു മിനിട്ട് 20 സെക്കന്‍ഡ് ആണ് ടീസറിന്റെ ദൈര്‍ഘ്യം. മുണ്ട് മടക്കിക്കുത്തും മീശപിരിയും അങ്ങനെ ലാലേട്ടന്റെ ആരാധകര്‍ക്ക് വേണ്ട എല്ലാ ചേരുവകളും കോര്‍ത്തിണക്കിയ ഹെവി മാസ് ടീസര്‍ തന്നെയായിരിക്കും ഇത്. അദ്ദേഹത്തിന് ഒരു പിറന്നാള്‍ സമ്മാനമെന്ന നിലയിലാണ് ടീസര്‍ അണിയിച്ചൊരുക്കിയിരിക്കുന്നത്. വൈശാഖ് പറഞ്ഞു.
മലയാളത്തിലെ ഏറ്റവും മുതല്‍മുടക്കില്‍ ഒരുങ്ങുന്ന ചിത്രമെന്ന പ്രത്യേകതയുമായാണ് മോഹന്‍ലാലിന്റെ പുലിമുരുകന്‍ എത്തുന്നത്. അതീവരഹസ്യമായി ചിത്രീകരണം നടത്തിയ സിനിമയുടെ ലൊക്കേഷന്‍ ചിത്രങ്ങള്‍ പോലും അണിയറപ്രവര്‍ത്തകര്‍ പുറത്തിറക്കിയിട്ടില്ല. സിനിമയുടെ പോസ്റ്ററുകളും ആരാധകരില്‍ ആവേശം നിറച്ചു.
വൈശാഖ് സംവിധാനം നിര്‍വഹിച്ചിരിക്കുന്ന ചിത്രത്തിന്റെ റിലീസ് ജൂലായിലായിരിക്കും. സ്റ്റണ്ട് മാസ്റ്റര്‍ പീറ്റര്‍ ഹെയ്ന്‍ സംഘട്ടന സംവിധാനം നിര്‍വ്വഹിക്കുന്ന ചിത്രത്തില്‍ പുള്ളിപ്പുലിയുമായ സംഘട്ടനരംഗങ്ങളും ലാലിന്ന്റെ
വേറിട്ട ഗെറ്റപ്പും ഇതിനോടകം തന്നെ ഏറെ ചര്‍ച്ചയായി കഴിഞ്ഞു.
