മെല്‍ബണ്‍: ലോകകപ്പ് സെമിഫൈനലില്‍ ഇന്ത്യയെ തകര്‍ക്കുമെന്ന് ഓസ്‌ട്രേലിയന്‍ താരം ഗ്ലെന്‍ മാക്‌സ്‌വെല്‍. ലോകകപ്പിന് മുന്‍പ് നടന്ന ഓസ്‌ട്രേലിയന്‍ പരമ്പരയെ കുറിച്ച് ഇന്ത്യ ഓര്‍ക്കണമെന്നും ഇതേ ഗതി തന്നെയാണ് ലോകകപ്പിലും ഇന്ത്യയെ കാത്തിരിക്കുന്നതെന്നും മാക്‌സ്‌വെല്‍ പറഞ്ഞു. വിമാനത്താവളത്തില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ലോകകപ്പിലുടനീളം മികച്ച ഫോമിലാണ് ഇന്ത്യ. അല്ലെങ്കില്‍ അവര്‍ സെമിയിലല്‍ എത്തുമായിരുന്നില്ലല്ലോ. അപരാജിതരായി കുതിക്കുന്ന ഇന്ത്യയെ തളയ്ക്കാന്‍ ഓസ്‌ട്രേലിയക്ക് മികച്ച പ്രകടനം തന്നെ പുറത്തെടുക്കേണ്ടിവരും. കഴിഞ്ഞ പരമ്പരയില്‍ ഓസ്‌ട്രേലിയക്ക് ഇത് കഴിഞ്ഞിട്ടുണ്ട്. ഒരൊറ്റ മത്സരത്തില്‍ പോലും ഇന്ത്യയ്ക്ക് ജയിക്കാന്‍ കഴിഞ്ഞിരുന്നില്ല. ഈ പരമ്പരയുടെ ഓര്‍മകള്‍ ഇന്ത്യന്‍ ടീമിന്റെ മനസ്സിലുണ്ടാകും. ഈ മികച്ച പ്രകടനം ലോകകപ്പിലും തുടരാനാന്‍ ഓസ്‌ട്രേലിയക്ക് കഴിയുമെന്നും മാക്‌സ്‌വെല്‍ കൂട്ടിച്ചേര്‍ത്തു.
ഓസ്‌ട്രേലിയയെ സംബന്ധിച്ചിടത്തോളം ഇന്ത്യയ്‌ക്കെതിരായ മത്സരത്തേക്കാള്‍ ആഷസാണ് കൂടുതല്‍ പ്രധാനമെന്നും മാക്‌സ്‌വെല്‍ പറഞ്ഞു.
