ലണ്ടന്‍: ലോക ഒന്നാംനമ്പര്‍ താരം സെറീന വില്യംസ് റഷ്യയുടെ മരിയ ഷറപ്പോവ എന്നിവര്‍ വിംബിള്‍ഡന്‍ ടെന്നീസ് വനിതാവിഭാഗത്തില്‍ ക്വാര്‍ട്ടര്‍ഫൈനലില്‍ കടന്നു. വനിതാ ഡബിള്‍സില്‍ സാനിയ സഖ്യം ക്വാര്‍ട്ടറിലെത്തിയപ്പോള്‍ പുരുഷവിഭാഗത്തില്‍ പേസ് സഖ്യം പുറത്തായി.
വില്യംസ് സഹോദരിമാര്‍ നാലാം റൗണ്ടില്‍ ഏറ്റുമുട്ടിയപ്പോള്‍ ജയം അനുജത്തി സെറീന വില്യംസിനൊപ്പമായിരുന്നു.
വീനസിനെ നേരിട്ടുള്ള സെറ്റുകള്‍ക്ക് അനായാസം കീഴടക്കിയാണ് സെറീന മുന്നേറിയത് സ്‌കോര്‍ 6-4, 6-3. ഇരുവരും ഏറ്റുമുട്ടിയ 26-ാം മത്സരത്തിലെ സെറീനയുടെ 15-ാം വിജയമാണ് വിംബിള്‍ഡണില്‍ പിറന്നത്.
കസാഖ്‌സ്താന്റെ സറീന ഡയസിനെ തോല്‍പ്പിച്ചാണ് ഷറപ്പോവ ക്വാര്‍ട്ടര്‍ ബര്‍ത്തുറപ്പിച്ചത് (6-4, 6-4).
വനിതാ ഡബിള്‍സില്‍ ഒന്നാം സീഡുകളായ സാനിയ മിര്‍സ-മാര്‍ട്ടിന സഖ്യം സ്പാനിഷ് ജോഡികളായ അനാബെല്‍ മെഡീന-അരാന്ത സാന്റോന ടീമിനെയാണ് തോല്‍പ്പിച്ചത് (6-4, 6-3). എന്നാല്‍, പുരുഷവിഭാഗം ഡബിള്‍സില്‍ ലിയാന്‍ഡര്‍ പേസും കാനഡയുടെ ഡാനിയേല്‍ നെസ്റ്ററും ഓസ്ട്രിയന്‍-ബ്രസീല്‍ സഖ്യമായ അലക്‌സാന്‍ഡര്‍ പേയ-ബ്രൂണോ സോറസ് ടീമിനോട് തോറ്റുപുറത്തായി (6-3, 7-5, 3-6, 2-6, 6-2).
