ന്യൂഡല്‍ഹി: ആംആദ്മി പാര്‍ട്ടിക്കു പുതിയ ലോഗോ നിലവില്‍ വന്നു. പഴയ കുങ്കുമവും പച്ചയും ചേര്‍ന്ന നിറത്തിനു പകരം നീലനിറത്തിലുള്ളതാണ് പുതിയ ലോഗോ. പാര്‍ട്ടിയുടെ ഫേസ്ബുക്ക്, ട്വിറ്റര്‍ അക്കൗണ്ടുകളില്‍ പുതിയ ലോഗോയാണ് ഇപ്പോള്‍ ഉപയോഗിക്കുന്നത്. എന്നാല്‍, എഎപിയുടെ വെബ് സൈറ്റില്‍ പഴയ ലോഗോയാണ് ഇപ്പോഴുമുള്ളത്.
നിലവിലുണ്ടായിരുന്ന ലോഗോ ഡിസൈന്‍ ചെയ്ത മുന്‍ ആപ് വോളണ്ടിയര്‍ സുനില്‍ ലാല്‍ ഇത് ഉപയോഗിക്കരുതെന്നു ആവശ്യപ്പെട്ടിരുന്നു. ഇതാണ് പുതിയ ലോഗോയിലേക്കു മാറാന്‍ അരവിന്ദ് കെജ്‌രിവാളിനെയും സംഘത്തെയും പ്രേരിപ്പിച്ചത്. നേതൃത്വം പ്രവര്‍ത്തകരെ അവഗണിക്കുകയാണെന്നും പ്രതീക്ഷയ്‌ക്കൊത്ത് ഉയരുന്നില്ലെന്നും ആരോപിച്ച് താന്‍ ഡിസൈന്‍ ചെയ്ത ലോഗോ ഉപയോഗിക്കരുതെന്നു കെജ്‌രിവാളിനോട് ഇയാള്‍ ആവശ്യപ്പെട്ടിരുന്നു.
