ഹരാരേ: ഇന്ത്യ-സിംബാബ്‌വെ പരമ്പരയിലെ അവസാന ട്വന്റി20 ഇന്ന് ഹരാരെയില്‍ നടക്കും. വൈകുന്നേരം 4.30ന് മത്സരം ആരംഭിക്കും. രണ്ട് മത്സരങ്ങളുള്ള ട്വന്റി20 പരമ്പരയിലെ ആദ്യ മത്സരം 54 റണ്‍സിന് ഇന്ത്യ ജയിച്ചിരുന്നു. അതേസമയം മലയാളി താരം സഞ്ജു വി.സാംസണ്‍ രാജ്യാന്തര ക്രിക്കറ്റില്‍ ഇന്ന് അരങ്ങേറ്റം കുറിക്കുമോ എന്ന് ഉറ്റ് നോക്കുകയാണ് മലയാളികള്‍.
രാജസ്ഥാന്‍ റോയല്‍സിനു വേണ്ടി ഒരുമിച്ച് കളിച്ചിട്ടുള്ള അജിങ്ക്യ രാഹാനെ നായകനായത് സഞ്ജുവിനും മലയാളികള്‍ക്കും പ്രതീക്ഷ നല്‍കുന്നുണ്ട്. അതേസമയം ആദ്യ മത്സരത്തില്‍ റോബിന്‍ ഉത്തപ്പ് ഫോമില്‍ മടങ്ങിയെത്തിയത് സഞ്ജുവിന്റെ സാധ്യതകള്‍ക്ക് മങ്ങലേല്‍പ്പിക്കുന്നുണ്ട്. ആദ്യ മത്സരം ജയിച്ച ടീമിനെ നിലനിര്‍ത്താന്‍ നായകന്‍ തീരുമാനിച്ചാല്‍ സഞ്ജുവിന് അവസരം ലഭിക്കില്ല.
സിംബാബ്‌വെയ്ക്കു ഇതു അഭിമാന പോരാട്ടമാണ്. അവസാന ട്വന്റി20യിലെങ്കിലും ജയിച്ച് മുഖം രക്ഷിക്കാമെന്ന പ്രതീക്ഷയിലാണ് ആതിഥേയര്‍.
