അമാന്‍: ഐഎസ് തീവ്രവാദികള്‍ക്കെതിരായ പോരാട്ടം ശക്തമാക്കി ജോര്‍ദാന്‍. ഐഎസ് തീവ്രവാദികള്‍ പിടിച്ചുകൊണ്ടുപോയി ചുട്ടുകൊന്ന ജോര്‍ദാന്‍ പൈലറ്റിന്റെ കൊലപാതകത്തിന് ശക്തമായ രീതിയിലുള്ള മറുപടിയാണ് ജോര്‍ദാന്‍ നല്‍കി തുടങ്ങിയിരിക്കുന്നത്. സിറിയയിലെ ഐഎസ് ശക്തികേന്ദ്രങ്ങളില്‍ വീണ്ടും ജോര്‍ദാന്‍ ശക്തമായ വ്യോമാക്രമണം തുടങ്ങി. ഐഎസ് കൊലപ്പെടുത്തിയ ജോര്‍ദാന്‍ പൈലറ്റ് ലഫ്. സാഫി അല്‍ കസബീയുടെ വീട്ടില്‍ ജോര്‍ദാന്‍ രാജാവ് അബ്ദുള്ളാ രണ്ടാമന്‍ സന്ദര്‍ശനം നടത്തി.
കസബീയുടെ ഗ്രാമത്തിനു മുകളിലൂടെ നിരവധി യുദ്ധ വിമാനങ്ങള്‍ രാജാവിന്റെ വരവിനു മുന്നോടിയായി പറന്നു. കസബീയുടെ മോചനത്തിനായി ജോര്‍ദാന്‍ തടവില്‍ കഴിയുന്ന ഭീകര വനിത സാജീദായേ മോചിപ്പിക്കുവാന്‍ ജോര്‍ദാന്‍ തയാറായിരുന്നു. ഇതിന്റെ നടപടികള്‍ പുരോഗമിക്കുമ്പോളാണ് ഐഎസ് കസബീയേ കൊലപ്പെടുത്തിയത്. കസബീയേ കൊലപ്പെടുത്തി മണിക്കൂറുകള്‍ക്കകം തന്നെ ജോര്‍ദാന്‍ സാജീദായേയും മറ്റ് ഒരു ഭീകരനെയും തൂക്കികൊന്ന് അതെ നാണയത്തില്‍ തിരിച്ചടിച്ചു. ഇതിനു ശേഷമാണ് സിറിയയില്‍ ഐഎസ് തീവ്രവാദികള്‍ക്കെതിരേയുള്ള ആക്രമണം ശക്തമാക്കുവാനുള്ള നടപടികള്‍ തുടങ്ങിയിരിക്കുന്നത്.
