കറാച്ചി: മുന്‍ പാകിസ്താന്‍ പേസര്‍ ഷൊയിബ് അക്തറിന് ഓള്‍ സ്റ്റാര്‍ പരമ്പരയില്‍ കളിക്കാന്‍ താത്പര്യം. സച്ചിന്‍ നായകനാകുന്ന ബ്ലാസ്‌റ്റേഴ്‌സിന്റെ ഭാഗമാകാനുള്ള താത്പര്യം കഴിഞ്ഞ ദിവസം അക്തര്‍ അറിയിച്ചു. സച്ചിന്റെ ടീമിനായി പന്തെറിയാന്‍ തനിക്ക് താത്പര്യമുണ്ടെന്നാണ് അക്തര്‍ അറിയിച്ചത്.
സച്ചിനും ഷെയ്ന്‍വോണുമാണ് ഓള്‍ സ്റ്റാര്‍ ലീഗിന്റെ സംഘാടകര്‍. രണ്ട് ടീമുകളാണ് മത്സരിക്കുക ഇതില്‍ ബ്ലാസ്‌റ്റേഴ്‌സ് ടീമിനെ സച്ചിനും വാരിയേഴ്‌സ് ടീമിനെ വോണും നയിക്കും. ഈ മാസം 7,11,14 തീയതികളിലായി ന്യൂയോര്‍ക്ക്, ഹൂസ്റ്റണ്‍, ലോസ്ഏഞ്ചലസ് എന്നിവിടങ്ങളിലാണ് മത്സരങ്ങള്‍ നടക്കുക.
അന്താരാഷ്ട്ര ക്രിക്കറ്റില്‍ നിന്നും വിരമിച്ച പ്രമുഖ താരങ്ങളായ ബ്രയന്‍ ലാറ, സൗരവ് ഗാംഗുലി, വിരേന്ദര്‍ സെവാഗ്, മാത്യു ഹെയ്ഡന്‍, കുമാര്‍ സംഗക്കാര, വസീം അക്രം എന്നിവര്‍ പരമ്പരയില്‍ പങ്കെടുക്കും. അമേരിക്കയില്‍ ക്രിക്കറ്റിന് കൂടുതല്‍ പ്രചാരം നല്‍കുക എന്ന ലക്ഷ്യത്തോടെയാണ് ഓള്‍സ്റ്റാര്‍ പരമ്പര അമേരിക്കയില്‍ നടത്തുന്നത്.
