സത്യസായി ബാബയുടെ ജീവിതം പ്രമേയമായി തെലുങ്കില്‍ ഒരുങ്ങുന്ന ചിത്രം ബാബാ സത്യസായി എന്ന ചിത്രത്തില്‍ പ്രശസ്ത തെന്നിന്ത്യന്‍ നടി അനുഷ്‌ക ഷെട്ടിയും അഭിനയിക്കുന്നു. മലയാളത്തിലെ ജനപ്രീയ നടന്‍ ദിലീപാണ് സത്യസായി ബാബയുടെ വേഷത്തിലെത്തുന്നത്.
അനുഷ്‌കയുടെ കഥാപാത്രത്തെ കുറിച്ച് വ്യക്തമായ വിവരം അണിയറക്കാര്‍ പുറത്തു വിട്ടിട്ടില്ല. എന്നാല്‍ ബാബയുടെ അനുയായിയുടെ വേഷമാണ് അനുഷ്‌കയ്ക്ക് എന്നാണ് സൂചന. ജയപ്രദയാണ് ദിലീപിന്റെ അമ്മയുടെ വേഷത്തിലെത്തുന്നത്. കൊടി രാമകൃഷ്ണനാണ് ചിത്രത്തിന്റെ സംവിധായകന്‍.
സത്യസായി ബാബയുടെ 22 വയസ് മുതല്‍ അദ്ദേഹം സമാധിയായ 84 വയസു വരെയുള്ള ജീവിതത്തിലൂടെയാണ് സിനിമ സഞ്ചരിക്കുന്നത്. മറ്റൊരു മലയാള താരം ശ്രീജിത് വിജയും ഈ സിനിമയില്‍ ഒരു പ്രധാന വേഷത്തില്‍ എത്തുന്നുണ്ട്.
ഇംഗ്ലീഷ്, ഹിന്ദി അടക്കമുള്ള ഭാഷകളില്‍ ഈ സിനിമ മൊഴിമാറ്റം ചെയ്ത് പുറത്തിറക്കും. ബാബയുടെ വേഷം അവതരിപ്പിക്കുന്നതിന്റെ തയ്യാറെടുപ്പുകളുടെ ഭാഗമായി ദിലീപ്, പുട്ടപര്‍ത്തിയിലെ ആശ്രമത്തില്‍ താമസിച്ച് രീതികള്‍ മനസിലാക്കുകയും ചെയ്തിട്ടുണ്ട്.
