എം. പത്മകുമാര്‍ സംവിധാനം ചെയ്യുന്ന സിനിമയില്‍ മോഹന്‍ലാലിന്റെ നായികയായി യുവനടി ഹണി റോസ് എത്തുന്നു. ഇതാദ്യമായാണ് ഹണി മോഹന്‍ലാലിനൊപ്പം അഭിനയിക്കുന്നത്.
അനൂപ് മേനോനും ഈ സിനിമയില്‍ മോഹന്‍ലാലിനൊപ്പം മുഴുനീള വേഷത്തിലെത്തുന്നു. അനൂപ് രാമന്‍ എന്ന മാദ്ധ്യമ പ്രവര്‍ത്തകനായാണ് അനൂപ് എത്തുന്നത്.
തികച്ചും അപരിചിതരാണെങ്കിലും ഒരു പ്രത്യേക സാഹചര്യത്തില്‍ മോഹന്‍ലാല്‍ അവതരിപ്പിക്കുന്ന ജോണ്‍ ഡേവിഡ് എന്ന കഥാപാത്രവും അനൂപ് രാമന്‍ എന്ന മാദ്ധ്യമ പ്രവര്‍ത്തകനും കണ്ടുമുട്ടുന്നതും തുടര്‍ന്നുണ്ടാവുന്ന സംഭവങ്ങളുമാണ് സിനിമയുടെ ഇതിവൃത്തം.
ഹണിയെ കൂടാതെ ഷീ ടാക്‌സി എന്ന സിനിമയിലൂടെ അരങ്ങേറ്റം കുറിച്ച ശീലു എബ്രഹാമാണ് അനൂപ് മോനോന്റെ ജോഡിയാവുന്നു. ബോളിവുഡ് നടന്‍ അതുല്‍ കുല്‍ക്കര്‍ണി മറ്റൊരു പ്രധാനവേഷം ചെയ്യും. എസ്. സുരേഷ് ബാബുവാണ് ഈ സിനിമയ്ക്ക് തിരക്കഥ ഒരുക്കുന്നത്.
എറണാകുളം, മൈസൂരു, മൂന്നാര്‍, ദുബായ് എന്നിവിടങ്ങളിലാണ് ഷൂട്ടിംഗ്. ഈ മാസം 18ന് കൊച്ചിയില്‍ ഷൂട്ടിംഗ് ആരംഭിക്കും.
