സത്യന്‍ അന്തിക്കാടിന്റെ സംവിധാനത്തില്‍ ഒരുങ്ങുന്ന മോഹന്‍ലാല്‍ – മഞ്ജു വാര്യര്‍ ചിത്രത്തിന്റെ ആദ്യ ടീസര്‍ പുറത്തിറങ്ങി. പ്രേക്ഷകര്‍ ആകാംക്ഷയോടെ കാത്തിരിക്കുന്ന ‘എന്നും എപ്പോഴും’ എന്ന പേരിട്ടിരിക്കുന്ന ചിത്രം വിഷുവിന് മുന്നോടിയായി മാര്‍ച് 26 നാണ് തിയേറ്ററുകളിലെത്തുന്നത്. സത്യന്‍ അന്തിക്കാട്-മോഹന്‍ലാല്‍ ടീമിനൊപ്പം എണ്‍പതുകളില്‍ പിറന്ന സാധാരണക്കാരുടെ കഥ പറയുന്ന ചിത്രങ്ങളെ ഓര്‍മ്മിപ്പിക്കുന്ന രീതിയിലാണ് ആദ്യ ടീസര്‍.
അച്ചുവിന്റെ അമ്മയും മനസിനക്കരെയും അടക്കം സത്യനൊപ്പം ജനപ്രിയ ചിത്രങ്ങളൊരുക്കിയ രഞ്ജന്‍ പ്രമോദിന്റെ തിരക്കഥയിലാണ് ചിത്രം ഒരുങ്ങുന്നത്. മോഹന്‍ലാല്‍ വനിതാ മാസികയുടെ റിപ്പോര്‍ട്ടറായി അഭിനയിക്കുമ്പോള്‍ അഭിഭാഷകയുടെ വേഷത്തിലാണ് മഞ്ജു വാര്യര്‍.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിക്കുന്ന ചിത്രത്തില്‍ ഇന്നസെന്റ്, ലെന, റീനു മാത്യൂസ് തുടങ്ങിയവരും വേഷമിടുന്നു. ശ്രദ്ധേയനായ യുവ ഛായാഗ്രാഹകന്‍ നീല്‍ ഡി കുഞ്ഞയാണ് ക്യാമറ കൈകാര്യം ചെയ്യുന്നത്. വിദ്യാസാഗറാണ് പാട്ടുകള്‍ ഒരുക്കിയത്.
