ഈ പ്രണയ ദിനത്തില്‍ സിനിമാ ലോകത്ത് ദുല്‍ഖര്‍ സല്‍മാന്റേയും നിത്യ മേനോന്റെയും ദിവസമായിരുന്നു. ഇരുവരും നായികാ നായകന്മാരായി എത്തുന്ന രണ്ട് സിനിമകളുടെ ഫസ്റ്റ് ലുക്ക് പോസ്റ്ററുകള്‍ പുറത്തിറങ്ങി.
ദുല്‍ഖറിനേയും നിത്യയേയും കേന്ദ്ര കഥാപാത്രങ്ങളാക്കി മണിരത്‌നം സംവിധാനം ചെയ്യുന്ന പുതിയ ചിത്രം ഓകെ കണ്‍മണിയുടെ പോസ്റ്റര്‍ എത്തി. പ്രകാശ് രാജ്, കനിഹ എന്നിവരും പ്രധാന വേഷത്തില്‍ സിനിമയില്‍ എത്തുന്നുണ്ട്.
വൈരമുത്തുവാണ് സിനിമയിലെ ഗാനങ്ങള്‍ എഴുതിയിരിക്കുന്നത്. പതിവ് മണിരത്‌നം ചിത്രങ്ങള്‍ പോലെ എആര്‍ റഹ്മാന്‍ തന്നെയാണ് പുതിയ ചിത്രത്തിന്റേയും സംഗീത സംവിധായകന്‍.
അലൈപായുതേയ്ക്ക് ശേഷം ഛായാഗ്രാഹകന്‍ പിസി ശ്രീനിവാസനും മണിരത്‌നവും ഒന്നിക്കുന്ന ചിത്രമെന്ന പ്രത്യേകതയും ഓകെ കണ്‍മണിക്കുണ്ട്. 2000 ലാണ് അലൈപായുതേ പുറത്തിറങ്ങിയത്. ഓകെ കണ്‍മണി എപ്രിലില്‍ പുറത്തിറങ്ങുമെന്നാണ് പ്രതീക്ഷിക്കുന്നത്.
സംവിധായകന്‍ കമലിന്റെ മകന്‍ ജിനസ് മുഹമ്മദ് സംവിധാനം ചെയ്യുന്ന ചിത്രമാണ് 100 ഡെയ്‌സ് ഓഫ് ലൗ. ജിനസിന്റെ ആദ്യ സിനിമാ സംരംഭമാണിത്. ചിത്രത്തില്‍ എഴുത്തുകാരന്റെ വേഷത്തിലാണ് ദുല്‍ഖര്‍ എത്തുന്നത്. സിനിമയുടെ രണ്ടാമത്തെ പോസ്റ്ററാണ് ഇന്ന് പുറത്തിറങ്ങിയത്.
വരുന്ന മാര്‍ച്ചില്‍ 100 ഡെയ്‌സ് ഓഫ് ലൗ പുറത്തിറങ്ങും.
