അഡ്‌ലെയ്ഡ്: പാക്കിസ്ഥാനെ ആറു വിക്കറ്റിന് കീഴടക്കി ഓസ്‌ട്രേലിയ ലോകകപ്പ് ക്രിക്കറ്റിന്റെ സെമിഫൈനലിലെത്തി. സെമിയില്‍ ഇന്ത്യയാണ് ഓസ്ട്രേലിയയുടെ എതിരാളികള്‍.
പാക്കിസ്ഥാന്‍ ഉയര്‍ത്തിയ 213 റണ്‍സ് വിജയലക്ഷ്യം ഷെയ്ന്‍ വാട്‌സന്റെയും സ്റ്റീവന്‍ സ്മിത്തിന്റെയും അര്‍ധസെഞ്ചുറികളുടെ മികവില്‍ ഓസീസ് 33.5 ഓവറില്‍ നാലു വിക്കറ്റ് നഷ്ടത്തില്‍ മറികടന്നു. നാലു വിക്കറ്റ് വീഴ്ത്തി പാക്കിസ്ഥാനെ തകര്‍ത്ത ജോഷ് ഹേസല്‍വുഡാണ് കളിയിലെ കേമന്‍.
നേരത്തെ ടോസ് നേടി ആദ്യം ബാറ്റുചെയ്ത പാകിസ്ഥാന്‍ 49.5 ഓവറില്‍ 213 റണ്‍സെടുക്കുകയായിരുന്നു. ഓസ്ട്രേലിയയുടെ കൃത്യതയാര്‍ന്ന ബൗളിംഗിനെ കാര്യമായി ആക്രമിക്കാന്‍ പാക് ബാറ്റ്സ്‌മാന്‍മാര്‍ക്ക് സാധിച്ചില്ല. 41 റണ്‍സെടുത്ത ഹാരിസ് സൊഹൈലും, 34 റണ്‍സെടുത്ത മിസ്ബ ഉള്‍ ഹഖുമാണ് പാക് നിരയില്‍ ഭേദപ്പെട്ട ബാറ്റിംഗ് പുറത്തെടുത്തത്. ഷൊയ്ബ് മക്സൂദ് 29 റണ്‍സും ഷാഹിദ് അഫ്രിദി 23 റണ്‍സും നേടി. ഓസ്ട്രേലിയയ്ക്ക് വേണ്ടി നാലുവിക്കറ്റെടുത്ത ജോഷ് ഹസ്‌ല്‍വുഡാണ് ബൗളിംഗില്‍ തിളങ്ങിയത്. ഗ്ലെന്‍ മാക്സ്‌വെല്‍, മിച്ചല്‍ സ്റ്റാര്‍ക്ക് എന്നിവര്‍ രണ്ടു വിക്കറ്റ് വീതവും വീഴ്ത്തി.
