ഷാഹിദ് കപൂറും ആലിയ ഭട്ടും ആദ്യമായി ഒന്നിക്കുന്ന ചിത്രം ഷാന്ദാറിലെ പ്രണയഗാനം പുറത്തിറങ്ങി. മികച്ച പ്രതികരണമാണ് ഗാനത്തിന് ലഭിച്ചു കൊണ്ടിരിക്കുന്നത്.
നിഖില്‍ ജോര്‍ജ് പോളും നീതി മോഹനും ചേര്‍ന്നാണ് ഗാനം ആലപിച്ചിരിക്കുന്നത്. അമിതാഭ് ഭട്ടാചാര്യയുടെ വരികള്‍ക്ക് അമിത് ത്രിവേതിയാണ് ഈണം പകര്‍ന്നിരിക്കുന്നത്.
ഷാഹിദ് കപൂറും ആലിയ ഭട്ടും പ്രണയ ജോഡികളായി എത്തുന്ന റൊമാന്റിക്ക് കോമഡി ചിത്രമാണ് ഷാന്ദാര്‍. ബിക്കിനി അണിഞ്ഞ് ആലിയ എത്തുന്ന ട്രെയിലര്‍ ഇതുവരെ 93 ലക്ഷം ആളുകളാണ് യൂട്യൂബിലൂടെ കണ്ടത്.
ബോളിവുഡിലെ ആദ്യ ഡെസ്റ്റിനേഷന്‍ വെഡിംഗ് ഫിലിം എന്നാണ് ഷാന്ദാറിനെ പറ്റി വിശേഷിപ്പിക്കുന്നത്. വികാസ് ബഹലാണ് ചിത്രത്തിന്റെ സംവിധായകന്‍. കരണ്‍ ജോഹര്‍, അനുരാഗ് കശ്യാപ്, വിക്രമാദിത്യ മോട്ട്വാനെ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. കരണ്‍ ജോഹര്‍ അതിഥി താരമായും ചിത്രത്തിലെത്തുന്നുണ്ട്. ഒക്ടോബര്‍ 22ന് ചിത്രം റിലീസ് ചെയ്യും.
ഷാഹിദ് കപൂറിനേയും, ആലിയ ഭട്ടിനേയും കൂടാതെ പങ്കജ് കപൂര്‍, സഞ്ജയ് കപൂര്‍, അഞ്ജന സുഖാനി, സുഷമ സേത്ത്, ദില്‍ജിത്ത് എന്നിവരും ചിത്രത്തില്‍ അഭിനയിക്കുന്നുണ്ട്.
