തൈക്കുടം ബ്രിഡ്ജ് ഫെയിം സിദ്ധാര്‍ത്ഥ് മേനോന്‍ നായകനാകുന്ന ചിത്രം ‘ഓണ്‍ ദി റോക്ക്‌സ്’ പോസ്റ്റര്‍ പുറത്തിറങ്ങി. വി.കെ.പ്രകാശാണ് സംവിധാനം.
ബാംഗ്ലൂര്‍ നഗരത്തിലെ പ്രശസ്തമായ മ്യൂസിക് ബാന്‍ഡിന്റെ കഥയാണ് ചിത്രം പറയുന്നത്. ബാന്‍ഡിന്റെ ക്യാപ്റ്റനായാണ് സിദ്ധാര്‍ത്ഥ് മേനോന്‍ അഭിനയിക്കുന്നത്. തിരക്കഥയൊരുക്കുന്നത് രാജശ്രീ ബലറാം. ഛായാഗ്രഹണം എസ്.ലോകനാഥനും ചിത്രസംയോജനം സുനില്‍.എസ്.പിള്ളയും നിര്‍വ്വഹിക്കുന്നു.
പ്രശസ്ത സംവിധായകനായിരുന്ന വി.കെ.പവിത്രന്റെ മകള്‍ ഇവ പവിത്രനാണ് ‘ഓണ്‍ ദി റോക്ക്‌സി’ല്‍ നായികയായെത്തുന്നത്. സംഗീതസാന്ദ്രമായി കഥ പറയുന്ന ചിത്രത്തില്‍ ഏഴു പാട്ടുകളാണുള്ളത്. ശബരീഷ് വര്‍മ്മ, മഞ്ജുവാണി എന്നിവരുടെ വരികള്‍ക്ക് പ്രശാന്ത് പിള്ള ഈണം നല്‍കിയിരിക്കുന്നു.
മഞ്ഞില്‍ വിരിഞ്ഞ പൂക്കളിലൂടെ മലയാളികളുടെ പ്രിയങ്കരിയായിത്തീര്‍ന്ന പൂര്‍ണ്ണിമ ഭാഗ്യരാജ് ഏറെക്കാലത്തിനുശേഷം മലയാളത്തിലെത്തുന്ന ചിത്രം കൂടിയാണ് ‘ഓണ്‍ ദി റോക്ക്‌സ്.’
