കോഴിക്കോട്: വീട്ടുജോലിക്ക് നിർത്തിയ പ്രായപൂർത്തിയാകാത്ത പെൺകുട്ടിക്ക് ക്രൂരമർദ്ദനം. കോഴിക്കോട് പന്തീരങ്കാവിലെ സ്വകാര്യ ആശുപത്രിയിലെ ഡോക്ടറും ഭാര്യയുമാണ് നിയമവിരുദ്ധമായി പതിനഞ്ച് വയസ്സുള്ള പെൺകുട്ടിയെ കൊണ്ട് വീട്ടുവേല ചെയ്യിപ്പിച്ചതും ക്രൂരമായി മർദ്ദിച്ചതും. ഉത്തരേന്ത്യൻ സ്വദേശിനിയാണ് മർദ്ദനമേറ്റ പെൺകുട്ടി. കുട്ടിയെ ബെൽറ്റ് കൊണ്ട് അടിക്കുകയും പൊള്ളലേൽപ്പിക്കുകയും ചെയ്തുവെന്നാണ് പരാതി. കുട്ടിയെ ചൈൽഡ് ലൈൻ അധികൃതരെത്തി ബാലികാ മന്ദിരത്തിലേക്ക് മാറ്റി. കുട്ടിയുടെ വിശദമായ മൊഴി പന്തീരങ്കാവ് പൊലീസ് രേഖപ്പെടുത്തി വരികയാണ്. പെൺകുട്ടിയെ വീട്ടുവേലയ്ക്ക് നിർത്തിയതും ക്രൂരമായി മർദ്ദിക്കുന്നതും ശ്രദ്ധയിൽപ്പെട്ട ചില അയൽവാസികളാണ് വിവരം ചൈൽഡ് ലൈൻ പ്രവർത്തകരെ അറിയിച്ചത്.
ഡോക്ടറുടെ വീട്ടിൽ ബാലവേല: ക്രൂരമര്‍ദ്ദനമേറ്റ പതിനഞ്ചുകാരിയെ രക്ഷപ്പെടുത്തി ചൈൽഡ് ലൈൻ പ്രവര്‍ത്തകര്‍
