മലപ്പുറം: കൊണ്ടോട്ടി ഐക്കരപ്പടിക്ക് സമീപം ടൂറിസ്റ്റ് ബസ് ലോറിയിലിടിച്ച് അഞ്ചു പേര്‍ മരിച്ചു. കണ്ണൂര്‍ മട്ടന്നൂര്‍ സ്വദേശികളായ രവീന്ദ്രന്‍ (54), ഓമന(42), ദേവി (67), സൂര്യ (13) അതുല്‍ (10) എന്നിവരാണ് മരിച്ചത്. ഇരുപതോളം പേര്‍ക്ക് പരിക്കേറ്റു. പുലര്‍ച്ചെ മൂന്നരയോടെയായിരുന്നു അപകടം.
സേലത്തു വിവാഹച്ചടങ്ങില്‍ പെങ്കടുത്ത് കണ്ണൂരിലേക്ക് മടങ്ങുകയായിരുന്ന സംഘമാണ് അപകടത്തില്‍ പെട്ടത്. നിര്‍ത്തിയിട്ട ലോറിയില്‍ ബസ് ഇടിച്ചാണ് അപകടമുണ്ടായത്.
അമിത വേഗത്തിലെത്തിയ ബൈക്കില്‍ ഇടിക്കാതിരിക്കാന്‍ വെട്ടിച്ച ബസ് ലോറിയിലിടിച്ച് നിയന്ത്രണം വിട്ട് മതിലില്‍ ഇടിക്കുകയായിരുന്നു. ബസിെന്റ ഇടതുവശം പൂര്‍ണമായി തകര്‍ന്നു.നാലു പേര്‍ സംഭവസ്ഥലത്തു തന്നെ മരിച്ചു. ബസിലുണ്ടായിരുന്നവര്‍ ബഹളം വച്ചതിനെ തുടര്‍ന്ന് എത്തിയ നാട്ടുകാരാണ് രക്ഷാ പ്രവര്‍ത്തനം തുടങ്ങിയത്. പൊലീസും, ഫയര്‍ഫോഴ്‌സും എത്തി ബസ് വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്.
