ന്യൂഡല്‍ഹി: ദക്ഷിണാഫ്രിക്കയ്‌ക്കെതിരായി ഡല്‍ഹിയില്‍ നടന്ന നാലാം ക്രിക്കറ്റ് ടെസ്റ്റിലും ഇന്ത്യയ്ക്ക് ജയം. 337 റണ്‍സിനാണ് ഇന്ത്യയുടെ ജയം. ഇതോടെ നാലു ടെസ്റ്റുകളുടെ പരമ്പര ഇന്ത്യ 3-0ന് സ്വന്തമാക്കി. രണ്ടാം ടെസ്റ്റ് മഴയെ തുടര്‍ന്ന് ഉപേക്ഷിച്ചിരുന്നു.
481 റണ്‍സിന്റെ വിജയലക്ഷ്യം പിന്തുടര്‍ന്ന ദക്ഷിണാഫ്രിക്ക 143 റണ്‍സിന് എല്ലാവരും പുറത്തായി. ക്ഷമയോടെ പിടിച്ചു നിന്ന എ.ബി.ഡിവില്ലിയേഴ്‌സ് (43) ആണ് സന്ദര്‍ശകരുടെ തോല്‍വിയുടെ ആഘാതം ഇത്രയെങ്കിലും കുറച്ചത്. ടെമ്പ ബവുമ (34) റണ്‍സെടുത്തു. ഇന്ത്യയ്ക്കു വേണ്ടി രണ്ടാമിന്നിംഗ്‌സില്‍ അശ്വിന്‍ അഞ്ചും ഉമേഷ് യാദവ് മൂന്ന് വിക്കറ്റ് വീഴ്ത്തി.
രണ്ടു വിക്കറ്റിന് 72 റണ്‍സെന്ന നിലയില്‍ അഞ്ചാംദിനം ബാറ്റിംഗ് ആരംഭിച്ച ദക്ഷിണാഫ്രിക്കയ്ക്ക് ഹാഷിം ആംല(25)യുടെ വിക്കറ്റാണ് ആദ്യം നഷ്ടമായത്. ജഡേജയുടെ ബൗളിംഗില്‍ ആംല ബൗള്‍ഡാവുകയായിരുന്നു. തുടര്‍ന്ന് വന്ന ഡൂപ്‌ളെസിസിനേയും ചുവട് ഉറപ്പിക്കുന്നതിന് മുന്പ് ജഡേജ പുറത്താക്കി. നാലാം വിക്കറ്റില്‍ ഡൂപ്‌ളെസിസും ഡിവില്ലിയേഴ്‌സും ചേര്‍ന്ന് 35 റണ്‍സിന്റെ കൂട്ടുകെട്ട് ഉണ്ടാക്കി. രണ്ടാം വിക്കറ്റില്‍ ആംലയും ബവുമയും ചേര്‍ന്ന് 45 റണ്‍സ് ചേര്‍ത്തതിന് ശേഷമുള്ള മികച്ച കൂട്ടുകെട്ടാണിത്.
