കേരളത്തിന്റെ വാനമ്പാടി കെ എസ് ചിത്രയ്ക്ക് പിറന്നാളാശംസയുമായി പ്രതിപക്ഷ നേതാവ് വി ഡി സതീശന്‍. മഞ്ഞള്‍ പ്രസാദത്തിന്റെ നൈര്‍മല്യത്തിന് അറുപത്. പ്രിയങ്കരിയായ കെ എസ് ചിത്രയ്ക്ക് പിറന്നാള്‍ ആശംസകള്‍. എന്നാണ് വി ഡി സതീശന്‍ ഫേസ്ബുക്കില്‍ കുറിച്ചത്.
വി ഡി സതീശന്റെ കുറിപ്പ് ഇങ്ങനെ
ആ പാട്ടുകളും സൗമ്യ സാന്നിധ്യവും നിറചിരിയും മലയാളിയുടെ ജീവിതത്തെ എത്രകണ്ട് മനോഹരമാക്കിയെന്ന് പറയാനാകില്ല. പെര്‍ഫെക്ട്, അതാണ് പാട്ടുകളുടെ സ്വഭാവം. ഊതിക്കാച്ചിയ സ്വര്‍ണം പോലെ തിളക്കമുള്ള ശബ്ദം.
ഈണവും ഗാനത്തിന്റെ ഭാവവും വായിച്ചെടുക്കാനുള്ള അസാധാരണ മികവ്… മനുഷ്യന് ഇങ്ങനെ പാടാനാകുമോയെന്നു തോന്നും വിധമുള്ള ആലാപനം… സാധനയുടെ നിറവ്… പൂര്‍ണതയ്ക്ക് വേണ്ടിയുള്ള ആത്മ സമര്‍പ്പണം… ഇതെല്ലാം ചേര്‍ന്നതാണ് ചിത്രയുടെ സംഗീതം. ഒരു കിളിപ്പാട്ടു പോലെ അത് നമ്മെ ആഹ്‌ളാദിപ്പിക്കും.ഒരു കടലാഴം പോലെ സംഗീതത്തിന്റെ അഗാധതയിലേക്ക് കൊണ്ടു പോകും. സ്വര്‍ണ മുകിലു പോലെ ആകാശത്ത് പറന്നു നടക്കും.
നാല് പതിറ്റാണ്ടായി ആര്‍ദ്രമായ ആ ശബ്ദം നമ്മള്‍ക്കൊപ്പമുണ്ട്. സ്‌നേഹവും പ്രണയവും ചിരിയും വാത്സല്യവും എല്ലാം നിറഞ്ഞ ചിത്ര ഗീതങ്ങളിലെ വിരഹവും ഭക്തിയുമാണ് എനിക്കേറ്റവും പ്രിയപ്പെട്ടവ. ഇനിയും ഇനിയും പാടുക, സംഗീതത്തിന്റെ അമൃതവര്‍ഷിണിയായി. മലയാളത്തിന്റെ പ്രിയപ്പെട്ട വാനമ്പാടിക്ക് സ്‌നേഹാദരങ്ങളോടെ ആയുരാരോഗ്യ സൗഖ്യം നേരുന്നു.
