ആലപ്പുഴ: ആലപ്പുഴ നൂറനാട് മണ്ണെടുപ്പിനെതിരെ പ്രതിഷേധിച്ച 60 പേര്‍ അറസ്റ്റില്‍. ഇവരെ ചെങ്ങന്നൂര്‍, നൂറനാട്, വെണ്‍മണി എന്നീ സ്റ്റേഷനുകളിലേക്ക് മാറ്റി. അതിനിടെ, മാവേലിക്കര എംഎല്‍എ അരുണ്‍ കുമാറിനെ പൊലീസ് മര്‍ദിച്ചതായി പരാതി ഉയര്‍ന്നു. സിപിഎം ലോക്കല്‍ സെക്രട്ടറി എ നൗഷാദ്, സിപിഐ ലോക്കല്‍ സെക്രട്ടറി നൗഷാദ് എ അസീസ്, സിപിഎം – സിപിഐ നേതാക്കളായ ഷീജ ലക്ഷ്മി, ആര്‍ സുജ, എസ് രജനി, കെ സുമ എന്നിവര്‍ക്ക് സംഘര്‍ത്തില്‍ പരിക്കേറ്റു. മുഖ്യമന്ത്രിയുമായി സിപിഎം ജില്ലാ സെക്രട്ടറി ചര്‍ച്ച നടത്തുകയാണെന്ന് നേതാക്കള്‍ അറിയിച്ചു. നാട്ടികാര്‍ പ്രതിഷേധം തുടരുമ്പോഴും നൂറനാട് മണ്ണെടുപ്പ് തകൃതിയായി നടക്കുകയാണ്.
നൂറനാട് മറ്റപ്പള്ളിയില്‍ ദേശീയപാത നിര്‍മാണത്തിനുള്ള മണ്ണെടുപ്പിനെതിരെ റോഡില്‍ കുത്തിയിരുന്ന് പ്രതിഷേധിച്ച നൂറുകണക്കിനാളുകളെ പൊലീസ് ബലമായി അറസ്റ്റ് ചെയ്ത് നീക്കിയ നടപടിക്കെതിരെയാണ് വ്യാപക പ്രതിഷേധം ഉണ്ടായത്. സമാധനപരമായി സമരം നടത്തുന്നവര്‍ക്കുനെരെ പൊലീസ് സ്വീകരിച്ച നടപടിയില്‍ ഭരണകക്ഷി എംഎല്‍എ ഉള്‍പ്പെടെയുള്ളവര്‍ വിമര്‍ശനവുമായി രംഗത്തെത്തി. ഉച്ചയോടെ സമരക്കാരെ പൂര്‍ണമായും സ്ഥലത്തുനിന്നും അറസ്റ്റ് ചെയ്തു മാറ്റി. സ്ഥലത്ത് ഇപ്പോഴും പൊലീസ് നിലയുറപ്പിച്ചിട്ടുണ്ട്. മണ്ണെടുപ്പ് നടക്കുന്ന സ്ഥലത്തേക്കുള്ള റോഡ് ബാരിക്കേഡ് ഉപയോഗിച്ച് അടച്ചിരിക്കുകയാണ്. ജനകീയ സമരം നടക്കുമ്പോഴും പൊലീസ് കാവലില്‍ പാലമേല്‍ പഞ്ചായത്തിലെ മറ്റപള്ളി മേഖലയില്‍ മണ്ണെടുപ്പ് തുടരുകയാണ്. പ്രതിഷേധങ്ങള്‍ ഒഴിവാക്കി മറ്റു വഴികളിലൂടെയാണ് നിരവധി ടിപ്പര്‍ ലോറികളില്‍ മണ്ണ് കൊണ്ടു പോകുന്നത്.
