സംവിധായകന്‍ മണിരത്‌നത്തിന്റെ സിനിമയില്‍ അഭിനയിക്കാന്‍ ആഗ്രഹമുണ്ടെന്ന് ബോളിവുഡ് താരം ആലിയഭട്ട് . തന്റെ അച്ഛന്‍ മഹേഷ് ഭട്ട് പ്രാദേശിക സിനിമകള്‍ കാണാന്‍ തന്നെ നിര്‍ബന്ധിക്കാറുണ്ടെന്നും തീര്‍ച്ചയായും ബംഗാളി ചിത്രത്തില്‍ അഭിനയിക്കണമെന്ന് പറയാറുണ്ടെന്നും ആലിയ പറയുന്നു.
മാത്രമല്ല തനിക്ക് മണിരത്‌നത്തിന്റെ ചിത്രത്തില്‍ അഭിനയിക്കാന്‍ ആഗ്രഹമുണ്ടെന്നും ചിലപ്പോള്‍ മണിസാറിനൊപ്പം ജോലിചെയ്യാന്‍ ദക്ഷിണേന്ത്യയിലേക്ക് പോകേണ്ടി വരുമെന്നും താരം പറഞ്ഞു.
മണിരത്‌നത്തിന്റെ ഒ.കെ കണ്‍മണി എന്ന തമിഴ് ചിത്രത്തില്‍ ദുല്‍ക്കറിന്റെ നായിക ആലിയ ആയിരിക്കുമെന്ന് വാര്‍ത്തകള്‍ ഉണ്ടായിരുന്നു. കൂടാതെ ചിത്രത്തിന്റെ ഹിന്ദി പതിപ്പില്‍ ആലിയെയും വരുണ്‍ ദവാനെയും നായികാ നായികന്മാരായി മണിരത്‌നം തീരുമാനിച്ചിരുന്നതായും റിപ്പോര്‍ട്ടുകള്‍ വന്നിരുന്നു. എന്നാല്‍ പിന്നീട് ദുല്‍ഖര്‍ നിത്യ മേനോന്‍ എന്നിവരെ പ്രധാന കഥാപാത്രങ്ങളാക്കി തമിഴില്‍ അദ്ദേഹം ഒ.കെ കണ്‍മണി ചെയ്യുകയായിരുന്നു. ഇതിന്റെ ഹിന്ദി റീമേക്കായ ഒ.കെ ജാനു കരണ്‍ജോഹറാണ് നിര്‍മ്മിക്കുന്നത്. ശ്രദ്ധ കപൂറും ആദിത്യ റോയി കപൂറുമാണ് നായികാ നായകന്മാര്‍.
