സിനിമാ പ്രേമികളുടെ പ്രിയതാരമാണ് ഹോളിവുഡ് സൂപ്പര്‍സ്റ്റാര്‍ ക്ലിന്റ് ഈസ്റ്റ് വുഡ്. ഈസ്റ്റ് വുഡിന് ആദരമെന്നോണം ഈയിടെ കാര്‍ത്തിക് സുബ്ബരാജ് ജിഗര്‍തണ്ട-ഡബിള്‍ എക്‌സ് എന്ന ചിത്രം ഇറക്കുകയും നിരൂപക പ്രശംസ നേടുകയും ചെയ്തിരുന്നു. ഈയിടെ ഒ.ടി.ടിയില്‍ റിലീസായപ്പോഴും ഡബിള്‍ എക്‌സിനെ ഇരുകയ്യുംനീട്ടിയാണ് സിനിമാപ്രേമികള്‍ സ്വീകരിച്ചത്. ഈ ചിത്രം കാണണമെന്ന് ക്ലിന്റ് ഈസ്റ്റ് വുഡിന്റെ എക്‌സ് പേജില്‍ പോസ്റ്റിട്ട ആരാധകന് മറുപടിയുമായി സൂപ്പര്‍താരംതന്നെ എത്തിയിരിക്കുകയാണ്.
രാഘവാ ലോറന്‍സും എസ്.ജെ. സൂര്യയുമാണ് ജിഗര്‍തണ്ട-ഡബിള്‍ എക്‌സില്‍ മുഖ്യവേഷങ്ങളിലെത്തിയത്. ക്ലിന്റ് ഈസ്റ്റ് വുഡിന്റെ ആരാധകനായ അലിയസ് സീസര്‍ എന്ന കഥാപാത്രമായാണ് ലോറന്‍സ് എത്തിയത്. ഈസ്റ്റ് വുഡിന്റെ പ്രശസ്തമായ കഥാപാത്രങ്ങളെ അനുസ്മരിപ്പിക്കുന്ന രീതിയിലുള്ള വേഷവിധാനങ്ങളായിരുന്നു ഈ കഥാപാത്രത്തിന്. ജിഗര്‍തണ്ടയേക്കുറിച്ചും അതിലെ ഈസ്റ്റ് വുഡിന്റെ സാന്നിധ്യത്തേക്കുറിച്ചും വിജയ് എന്ന ആരാധകനാണ് ഹോളിവുഡ് സൂപ്പര്‍താരത്തിന്റെ എക്‌സ് പേജില്‍ സൂചിപ്പിച്ചത്.
പ്രിയപ്പെട്ട ക്ലിന്റ്, ഇന്ത്യക്കാരായ ഞങ്ങള്‍ ജിഗര്‍തണ്ട-ഡബിള്‍ എക്‌സ് എന്ന ഒരു തമിഴ്ചിത്രം നിര്‍മിച്ചിട്ടുണ്ട്. അത് ഇപ്പോള്‍ നെറ്റ്ഫ്‌ളിക്‌സില്‍ ലഭ്യമാണ്. ചിത്രത്തിലുടനീളം ഞങ്ങള്‍ നിങ്ങള്‍ക്കുള്ള ആദരമാണ് പ്രകടിപ്പിച്ചിരിക്കുന്നത്. നിങ്ങളുടെ ചെറുപ്പകാലം അനുസ്മരിപ്പിക്കുന്ന ചില അനിമേഷന്‍ രംഗങ്ങളും ചിത്രത്തിലുള്‍പ്പെടുത്തിയിട്ടുണ്ട്. സമയംകിട്ടുമെങ്കില്‍ ഈ സിനിമ നിങ്ങളൊന്ന് കാണണം. എന്നായിരുന്നു ആരാധകന്റെ വാക്കുകള്‍. എന്നാല്‍ ഇദ്ദേഹത്തേപ്പോലും ഞെട്ടിച്ചുകൊണ്ട് മറുപടിയുമായി സാക്ഷാല്‍ ക്ലിന്റ് ഈസ്റ്റ് വുഡ് തന്നെ രംഗത്തെത്തി. ക്ലിന്റിന് ഈ ചിത്രത്തേക്കുറിച്ച് അറിയാമെന്നും ഇപ്പോള്‍ ചെയ്തുകൊണ്ടിരിക്കുന്ന ജ്യൂറര്‍ 2 എന്ന ചിത്രം പൂര്‍ത്തിയാക്കിയശേഷം അദ്ദേഹം ഡബിള്‍ എക്‌സ് കാണുമെന്നുമാണ് വിജയ്ക്ക് ലഭിച്ച മറുപടി.
Hi. Clint is aware of this Movie and he states he will get to it upon Completion of his New Film. Juror 2. Thank You. https://t.co/4UpiIOSzdj
— Clint Eastwood Official (@RealTheClint) December 13, 2023
