ന്യൂഡല്‍ഹി: ഐ.എസില്‍ ചേര്‍ന്ന ഒരു മലയാളി കൂടി കൊല്ലപ്പെട്ടു. കഴിഞ്ഞ വര്‍ഷം കാണാതായതും ഭീകരസംഘടനയായ ഐ.എസ്.ഐ.എസില്‍ ചേര്‍ന്നയാളുമായ മലപ്പുറം സ്വദേശി സൈഫുദിന്‍ ആണ് കൊല്ലപ്പെട്ടത്.
കേന്ദ്ര ഇന്റലിജന്‍സ് വിഭാഗത്തിലെ ഒരു ഉദ്യോഗസ്ഥനാണ് ഈ വിവരം അറിയിച്ചത്. ഇതുവരെ പുരുഷന്മാരും, സ്ത്രീകളും, കുട്ടികളും അടങ്ങുന്ന, കേരളത്തില്‍ നിന്നുമുള്ള 98 പേര്‍ ഐ.എസിന്റെ ഭാഗമായിട്ടുണ്ടെന്നാണ് കേന്ദ്ര സുരക്ഷാ ഏജന്‍സികള്‍ നല്‍കുന്ന വിവരം.
ജൂണോടെ, ഇക്കൂട്ടത്തിലെ 38 പേര്‍ കൊല്ലപ്പെട്ടുവെന്നും സുരക്ഷാ ഏജന്‍സികള്‍ പറയുന്നു. കേരളത്തില്‍ നിന്നും ഐ.എസിലേക്ക് പുറപെട്ടുപോയ മലയാളികള്‍ ഏറ്റവും കൂടുതലുള്ള ജില്ലകളില്‍ ഒന്നാണ് മലപ്പുറം ജില്ല. കണ്ണൂരും കാസര്‍ഗോഡുമാണ് മറ്റ് രണ്ട് ജില്ലകള്‍. കഴിഞ്ഞ രണ്ടാഴ്ചയ്ക്കുള്ളില്‍ ഇത് രണ്ടാം തവണയാണ് ഐ.എസില്‍ ചേര്‍ന്ന ഒരു മലയാളി കൊല്ലപ്പെടുന്നത്.
ഇതിന് മുന്‍പ് മലപ്പുറം എടപ്പാള്‍ സ്വദേശിയായ മുഹമ്മദ് മുഹ്‌സിനാണ് അഫ്ഗാനിസ്ഥാനില്‍ കൊല്ലപ്പെട്ടതായുള്ള വിവരം ലഭിച്ചത്. വീട്ടുകാര്‍ക്ക് വന്ന സന്ദേശത്തിലൂടെയാണ് മരണം സ്ഥിരീകരിച്ചത്. അമേരിക്ക നടത്തിയ ഡ്രോണ്‍ ആക്രമണത്തില്‍ മുഹ്‌സിന്‍ കൊല്ലപ്പെട്ടുവെന്ന് മലപ്പുറത്തുള്ള കുടുംബാംഗങ്ങള്‍ക്ക് വാട്ട്‌സാപ്പ് വഴി സന്ദേശം ലഭിക്കുകയായിരുന്നു.
