ഗുരുഗ്രാം: പാര്‍ക്കിംഗിനെ ചൊല്ലിയുണ്ടായ തര്‍ക്കത്തില്‍ ഓട്ടോറിക്ഷ ഡ്രൈവര്‍ക്കു നേരെ യുവതി നിറയൊഴിച്ചു. സംഭവത്തെ തുടര്‍ന്ന് യുവതിയെ പൊലീസ് അറസ്റ്റ് ചെയ്തിട്ടുണ്ട്. ഗുരുഗ്രാം സെക്ടര്‍ ഒമ്പതിലെ ഭവാനി എന്‍ക്ലേവില്‍ ബുധനാഴ്ച രാവിലെയായിരുന്നു സംഭവം. സ്വപ്ന എന്ന യുവതിയാണ് വെടിയുതിര്‍ത്തത്. ഓട്ടോ ഡ്രൈവര്‍ സുനിലിന്റെ പരാതിയെ തുടര്‍ന്നാണ് യുവതിയെ പൊലീസ് അറസ്റ്റ് ചെയ്തത്.
സ്വപ്‌നയും സുനിലും സമീപവാസികളാണ്. കഴിഞ്ഞ ദിവസം രാവിലെ സ്വപ്ന വീട്ടില്‍ നിന്നും സ്‌കൂട്ടറില്‍ ഇറങ്ങി വരുമ്പോള്‍ സുനില്‍ വഴിക്കു കുറുകെ ഓട്ടോറിക്ഷയിട്ട ശേഷം ഫോണ്‍ ചെയ്യുകയായിരുന്നു. ഇതേതുടര്‍ന്ന് വാഹനം മാറ്റാന്‍ സ്വപ്ന ആവശ്യപ്പെടുകയും സുനില്‍ അതിന് തയ്യാറാകാതിരുന്നതോടെ തര്‍ക്കം ഉടലെടുക്കുകയായിരുന്നു. തുടര്‍ന്ന് നാട്ടുകാര്‍ ഇടപെട്ട് ഇരുവരേയും മാറ്റിയെങ്കിലും പിന്നീട് സ്വപ്ന തോക്കുമായി വന്ന് സുനിലിന് നേരെ വെടിയുതിര്‍ക്കുകയായിരുന്നു. എന്നാല്‍ സുനില്‍ വെടിയേല്‍ക്കാതെ ഒഴിഞ്ഞുമാറി. അറസ്റ്റിലായ സ്വപ്നയെ ചോദ്യം ചെയ്തു വരികയാണ്.
