ന്യൂഡല്ഹി: രാജ്യദ്രോഹക്കേസില് സിപിഐ നേതാവും ജെഎന്യു വിദ്യാര്ത്ഥി യൂണിയന് മുന് പ്രസിഡന്റുമായ കനയ്യ കുമാരിന് വിചാരണ നേരിടാന് പ്രൊസിക്യുട്ട് ചെയ്യാന് മുഖ്യമന്ത്രി അരവിന്ദ് കെജ്രിവാള് അനുമതി നല്കി. 2016ല് നടന്ന ജെഎന്യു സമരവുമായി ബന്ധപ്പെട്ട് ഇന്ത്യാ വിരുദ്ധ മുദ്രാവാക്യം മുഴക്കിയെന്നാണ് കേസ്. കേസില് കനയ്യ കുമാറിന് പുറമെ, ഉമര് ഖാലിദ്, അനിര്ഭന് ഭട്ടാചാര്യ എന്നിവരെയും പൊലീസ് അറസ്റ്റ് ചെയ്തിരുന്നു. മൂവരും പിന്നീട് ജാമ്യത്തിലിറങ്ങി.
അഫ്സല് ഗുരുവിനെ തൂക്കിലേറ്റിയ ദിവസം രാത്രി കാശ്മീരി വിദ്യാര്ത്ഥികള് അടക്കമുള്ളവര് ജെഎന്യു ക്യാംപസില് സംഘടിപ്പിച്ച പരിപാടിയാണ് വിവാദമായത്. എന്നാല് പിന്നീട് കനയ്യ കുമാര് നിരപരാധിയാണെന്ന് വാദിക്കുന്ന തരത്തില് വീഡിയോ ദൃശ്യം വ്യാജമാണെന്നടക്കം റിപ്പോര്ട്ടുകള് പുറത്തുവന്നിരുന്നു.