കൊച്ചി: മഹാരാജാസിന്റെ മണ്ണിൽ പിടഞ്ഞു വീണ എസ്.എഫ്.ഐ നേതാവിന്റെ ധീര രക്തസാക്ഷിത്വത്തിന് കെ.എസ്.യു നേതാവിന്റെയും പ്രണാമം.
മഹാരാജാസ് കോളജിലെ കെ.എസ്.യു നേതാവ് തംജീദ് താഹയുടെ ഫെയ്സ് ബുക്ക് പോസ്റ്റ് ഇതിനകം തന്നെ ശ്രദ്ധേയമായി കഴിഞ്ഞു.
കഴിഞ്ഞ ബുധനാഴ്‌ച കെ.എസ്.യു മഹാരാജാസിൽ സംഘടിപ്പിച്ച ഷൂട്ടൗട്ട് മത്സരത്തിൽ പങ്കെടുത്ത അഭിമന്യുവിന്റെ ടീം പങ്കെടുത്തതും രണ്ടാം സ്ഥാനം സ്വന്തമാക്കിയതും കെ.എസ്.യു നേതാവ് ഫെയ്സ് ബുക്ക് പോസ്റ്റിൽ കുറിച്ചു.
അഭിമന്യുവിന്റെ കോളജിലെ ‘വട്ടപ്പേര് ‘ വട്ടവടെ എന്ന് അഭിസംബോധന ചെയ്ത് ‘ഫൗൾ ആവാണ്ട് നോക്കിക്കോ ട്ടാ, ഫൗൾ ആയാ ഗോൾ തരില്ല’ എന്ന തലക്കെട്ടോടു കൂടി പെനാൽറ്റിക്ക് തയ്യാറായി നിൽക്കുന്ന അഭിമന്യുവിന്റെ ഫോട്ടോയും ഫെയ്സ് ബുക്ക് പോസ്റ്റിൽ പങ്കുവച്ചിട്ടുണ്ട്.
കെഎസ്‌യുക്കാർ നടത്തിയ പരിപാടിക്ക് ആദ്യമെത്തിയതു എസ്.എഫ്.ഐക്കാരനായ അഭിമന്യുവാണ്. മഹാരാജാസിൽ സൗഹാർദ്ദത്തോടു കൂടിയാണു വിദ്യാർഥി സംഘടനകൾ പ്രവർത്തിക്കുന്നതെന്നും ഒന്നര വർഷമായി ഇവിടെ സംഘർഷങ്ങളുണ്ടായിട്ടില്ലെന്നും കുറിപ്പിൽ പറയുന്നു. അഭിമന്യുവിന്റെ സ്വപ്നങ്ങൾക്കു വേണ്ടി ഒന്നിക്കാനും മഹാരാജാസിനെ പഴയ മഹാരാജാസാക്കി മാറ്റണമ‌െന്നും ആഹ്വാനം ചെയ്തുമാണു കുറിപ്പ് അവസാനിക്കുന്നത്. കെഎസ്‌യു മഹാരാജാസ് പേജിലും കുറിപ്പ് പങ്കു വച്ചിട്ടുണ്ട്.
