അബുദാബി: സ്വയംനിയന്ത്രിത വാഹനങ്ങളുടെ അത്ഭുത കാഴ്ചകളിലേക്ക് സന്ദര്‍ശകരെ ക്ഷണിച്ചു കൊണ്ട് യൂമെക്‌സ് (അണ്‍മാന്‍ഡ് സിസ്റ്റംസ് എക്‌സിബിഷന്‍ ആന്‍ഡ് കോണ്‍ഫറന്‍സ്) പ്രദര്‍ശനം ആരംഭിച്ചു. അബൂദാബി നാഷണല്‍ എക്‌സിബിഷന്‍ സെന്ററില്‍ നടക്കുന്ന പ്രദര്‍ശനം ഗതാഗത മേഖലയില്‍ ആഗോളാടിസ്ഥാനത്തില്‍ വരാന്‍ പോകുന്ന സാങ്കേതിക വിദ്യയുടെ മുന്നേറ്റങ്ങള്‍ അടുത്തറിയാണുള്ള അവസരമാണ് ഒരുക്കുന്നത്.
സാധാരണ റോഡുകള്‍ മുതല്‍ യുദ്ധക്കളങ്ങളില്‍ വരെ സ്വയം നിയന്ത്രിത ഉപകരണങ്ങള്‍ ഏതൊക്കെ തരത്തില്‍ സ്വാധീനം ചെലുത്തുമെന്നത് ഈ പ്രദര്‍ശനത്തിലൂടെ വ്യക്തമാക്കും. ഡ്രോണുകള്‍, റോക്കറ്റ് ലോഞ്ചറുകള്‍, യന്ത്രത്തോക്കുകള്‍ പിടിപ്പിച്ച കൂറ്റന്‍ വാഹനങ്ങള്‍, വിമാനാപകടങ്ങളിലെ ബ്ലാക്ക് ബോക്‌സുകള്‍ കണ്ടെത്താന്‍ സഹായിക്കുന്ന സീ എക്‌സ്‌പ്ലോറര്‍ തുടങ്ങിയ ഉപകരണങ്ങളെല്ലാം ഇതിലുണ്ട്.
