മിഷന്‍ ഇംപോസിബിളിന്റെ സെറ്റില്‍ വച്ച് കൊവിഡ് പ്രോട്ടോക്കോള്‍ ലംഘിച്ച സഹപ്രവര്‍ത്തകനോട് പൊട്ടിത്തെറിച്ച് ടോം ക്രൂയ്സ്. സഹപ്രവര്‍ത്തകനോട് ക്ഷുഭിതനാകുന്ന ടോം ക്രൂയ്സിന്റെ ഓഡിയോ ഇതിനകം വെെറലായി മാറിയിരിക്കുകയാണ്. കൊവിഡില്‍ ആളുകള്‍ ജോലിയില്ലാതെ കഷ്ടപ്പെടുന്ന ഈ സമയത്ത് കുറച്ചു പേര്‍ ഉത്തരവാദിത്തമില്ലാതെ പെരുമാറുന്നതില്‍ അമര്‍ഷമുണ്ടെന്ന് ടോം ക്രൂസ് പറയുന്നു.
“നമ്മളെ വിശ്വാസമുള്ളതുകൊണ്ടാണ് ഹോളിവുഡിൽ സിനിമ ചെയ്യാൻ അവർ തീരുമാനിച്ചത്. നിങ്ങള്‍ ചെയ്ത മണ്ടത്തരം എത്ര വലുതാണെന്ന് മനസിലാകുന്നുണ്ടോ. ഇനി ഒരിക്കല്‍ കൂടി ആവര്‍ത്തിച്ചാല്‍ നിങ്ങള്‍ ഞങ്ങളുടെ കൂടെയുണ്ടാകില്ല. രാത്രി മുഴുവൻ ഞാൻ നിർമാതാക്കളെയും ഇൻഷുറൻസ് കമ്പനികളെയും വിളിച്ചുകൊണ്ടിരിക്കുകയാണ്. അവരെല്ലാം നമ്മളെ ഉറ്റുനോക്കുന്നു. ആയിരക്കണക്കിന് പേരാണ് ഈ ജോലിയെ ആശ്രയിച്ചു കഴിയുന്നത്. ഇനി ഇതുപോലെ വീണ്ടും കാണാൻ എന്നെ ഇടവരുത്തരുത്.” ടോം പറഞ്ഞു.
കൊറോണ വെെറസ് പടര്‍ന്നാല്‍ ഇന്‍ഡസ്ട്രി മൊത്തമായി വീണ്ടും അടച്ചിടേണ്ടി വരുമെന്നും സിനിമാ ഇൻഡസ്ട്രി അടഞ്ഞു കിടക്കുന്നതിനാൽ പലർക്കും സ്വന്തം വീടുവരെ നഷ്ടമായി. ഭക്ഷണം കഴിക്കാനോ കോളജ് ഫീസ് അടയ്ക്കാനോ പോലും പൈസയില്ലെന്നും ടോം ക്രൂസ് സഹപ്രവര്‍ത്തകനെ ഓര്‍മ്മിപ്പിക്കുന്നു. ഇതൊക്കെയാണ് എല്ലാ രാത്രികളിലും ഞാൻ സ്വപ്നം കാണുന്നത്. അതുകൊണ്ട് ദയവ് ചെയ്ത് സുരക്ഷിതരായി ഇരിക്കാൻ ശ്രമിക്കൂ. ജോലിയിൽ ആത്മാർത്ഥത കാണിക്കൂവെന്നും അദ്ദേഹം കൂട്ടിച്ചേര്‍ക്കുന്നു.
ഒക്ടോബറിലാണ് മിഷന്‍ ഇംപോസിബിള്‍ 7ന്റെ ചിത്രീകരണം ആരംഭിക്കുന്നത്. സെറ്റിലെ 12 പേര്‍ക്ക് കൊവിഡ് സ്ഥിരീകരിച്ചിരുന്നു. ഇതോടെ ഷൂട്ടിങ് മാറ്റിവെക്കുക വരെയുണ്ടായി. ചിത്രത്തിന്റെ സഹനിര്‍മ്മാതാവ് കൂടിയാണ് ടോം ക്രൂസ്. തകര്‍ന്നു പോയൊരു ഇന്‍ഡസ്ട്രിയെ തിരികെ കൊണ്ടു വരാനുള്ള ശ്രമമാണ് ഇപ്പോള്‍ നടക്കുന്നത്. ഇതിനിടെ ഇത്തരം സമീപനം വലിയ ആഘാതങ്ങളുണ്ടാക്കുമെന്നാണ് ടോം ക്രൂസ് പറയുന്നത്.
