മലയാളത്തിന്റെ പ്രിയതാരം ആശ ശരത്തിന് ഗോള്‍ഡന്‍ വിസ. യുഎഇയില്‍ 10 വര്‍ഷത്തെ താമസകാലാവധി അനുവദിക്കുന്ന ഗോള്‍ഡന്‍ വിസ നടി ഏറ്റുവാങ്ങി. ദുബായ് താമസ കുടിയേറ്റ വകുപ്പ് ആസ്ഥാനത്ത് നടന്ന ചടങ്ങില്‍ വച്ചാണ് താരത്തിന് ഗോള്‍ഡന്‍ വിസ സമ്മാനിച്ചത്. കഴിഞ്ഞ 27 വര്‍ഷമായി ആശ ശരത്തും കുടുംബവും യുഎഇയിലാണ് താമസിക്കുന്നത്.
സിനിമ, നൃത്തം, കലാരംഗങ്ങളിലെ സംഭാവനക്കും പുതിയ കലാകാരന്മാരെ രൂപപ്പെടുത്തുന്നതിനും അവര്‍ക്ക് പ്രചോദനം നല്‍കുന്നതിനും തനിക്ക് ലഭിച്ച അംഗീകാരമാണിതെന്ന് ആശ ശരത്ത് പ്രതികരിച്ചു. കലാകാരന്മാരെയും സംരഭകരെയും ആദരിക്കുന്ന യുഎഇ ഭരണാധികാരിയെയും നടി പ്രശംസിച്ചു.
നേരത്തെ മലയാളത്തിലെ സൂപ്പര്‍ താരങ്ങളായ മോഹന്‍ലാലിനും മമ്മൂട്ടിക്കും, യുവതാരങ്ങളില്‍ പ്രമുഖരായ പൃഥ്വിരാജ്, ടൊവിനോ തോമസ്, ദുല്‍ഖര്‍ സല്‍മാന്‍, നൈല ഉഷ, അവതാരകന്‍ മിഥുന്‍ രമേഷ് എന്നിവര്‍ക്കും യുഎഇ ഭരണകൂടം ഗോള്‍ഡന്‍ വിസ നല്‍കിയിരുന്നു.
കലാമേഖലയിലെ സമഗ്രസംഭാവനക്കാണ് ഗോള്‍ഡന്‍ വിസ നല്‍കി വരുന്നത്. മലയാളത്തില്‍ നിന്ന് ഇനിയും നിരവധി താരങ്ങള്‍ക്ക് ഗോള്‍ഡന്‍ വിസ ലഭിക്കുമെന്നാണ് സൂചന.
