കൊച്ചി: നടിയെ ആക്രമിച്ച കേസിലെ മുഖ്യസാക്ഷി കോടതിയില് മൊഴി മാറ്റി.
ദിലീപിന്റെ ഭാര്യയും നടിയുമായ കാവ്യാ മാധവന്റെ ഓണ്ലൈന് വസ്ത്രവ്യാപാര സ്ഥാപനമായ ലക്ഷ്യയിലെ ജീവനക്കാരനാണ് ദിലീപിന് അനുകൂലമായി മൊഴി മാറ്റി പറഞ്ഞത്.
പ്രതി സുനില്കുമാര് ലക്ഷ്യയില് വന്നിട്ടില്ലെന്നാണ് പുതിയ മൊഴി. രഹസ്യമൊഴിയുടെ പകര്പ്പ് അന്വേഷണസംഘത്തിന് ലഭിച്ചു.
കീഴടങ്ങുന്നതിന്റെ തലേദിവസമാണ് സുനി ലക്ഷ്യയില് എത്തിയത് എന്നായിരുന്നു നേരത്തെ ഇയാള് മൊഴി നല്കിയിരുന്നത്. ലക്ഷ്യയുടെ വിസിറ്റിംഗ് കാര്ഡും സുനിയുടെ കൈയില് നിന്ന് പൊലീസിന് കിട്ടിയിരുന്നു. സുനി എത്തുമ്പോള് കാവ്യ ലക്ഷ്യയില് ഉണ്ടായിരുന്നില്ലെന്നും സാക്ഷിമൊഴിയില് നേരത്തെ പറഞ്ഞിരുന്നത്.
താന് കാവ്യയുടെ ഓണ്ലൈന് വസ്ത്രസ്ഥാപനമായ ലക്ഷ്യയില് പോയിരുന്നതായി സുനി നേരത്തേ അന്വേഷണസംഘത്തിനു മൊഴി നല്കിയിരുന്നു. എന്നാല് ഇതിന്റെ സിസിടിവി ദൃശ്യങ്ങള് ലക്ഷ്യയില് നിന്നു പൊലീസിനു ലഭിച്ചിരുന്നില്ല.
പള്സര് സുനി നല്കിയ മൊഴിയില് താന് കാവ്യയുടെ ഡ്രൈവറായി ജോലി ചെയ്തിട്ടുണ്ടെന്ന് വെളിപ്പെടുത്തിയിരുന്നു. എന്നാല് സുനിലിനെ അറിയില്ലെന്നായിരുന്നു കാവ്യ നല്കിയ മൊഴി.