ബോളിവുഡിലെ ഇടവേളയ്ക്ക് വിരാമമിട്ട് നടി പ്രീതി സിന്റ വീണ്ടും അഭിനയത്തിരക്കിലേക്ക് കടന്നു. സണ്ണി ഡിയോള്‍ നായകനാകുന്ന ഭയ്യാജി സൂപ്പര്‍ഹിറ്റ് എന്ന ചിത്രത്തിലാണ് കഴിഞ്ഞ ദിവസം പ്രീതി ജോയിന്‍ ചെയ്തത്.
നീരജ് പഥക് സംവിധാനം ചെയ്യുന്ന കോമഡി ചിത്രത്തില്‍ അമീഷ പട്ടേലും അര്‍ഷദ് വാര്‍സിയും ശ്രേയസ് തല്‍പഡേയും മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. അമീഷ പട്ടേലിനും സംവിധായകനുമൊപ്പം നില്‍ക്കുന്ന ചിത്രം പ്രീതി തന്റെ ട്വിറ്റര്‍ പേജില്‍ പോസ്റ്റ് ചെയ്തിരുന്നു.
ഒരു സിനിമാ താരത്തിന്റെയും നാടന്‍ പെണ്ണിന്റെയും കഥപറയുന്ന ചിത്രമാണ് ഭയ്യാജി സൂപ്പര്‍ഹിറ്റ്. അതില്‍ നാടന്‍ പെണ്ണായാണ് പ്രീതി അഭിനയിക്കുന്നത്.
സിനിമാതാരമായാണ് അമീഷ എത്തുക. ഇരുവരുടെയും സൗഹൃദങ്ങളും പ്രശ്‌നങ്ങളും ഒക്കെയാണ് ചിത്രത്തിന്റെ ഇതിവൃത്തം. ജൂണ്‍ മാസത്തോടു കൂടി ചിത്രം പ്രദര്‍ശനത്തിനെത്തും. 2014ല്‍ പുറത്തിറങ്ങിയ ഹാപ്പി എന്‍ഡിംഗ് ആണ് പ്രീതി ഒടുവില്‍ അഭിനയിച്ച ചിത്രം.
