റാഞ്ചി: ദക്ഷിണാഫ്രിക്കക്കെതിരായ രണ്ടാം ഏകദിനത്തിൽ ഇന്ത്യക്ക് ജയിക്കാൻ 279 റൺസ്. ആദ്യം ബാറ്റ് ചെയ്ത ദക്ഷിണാഫ്രിക്ക 50 ഓവറിൽ ഏഴ് വിക്കറ്റ് നഷ്ടത്തിൽ 278 റൺസ് കണ്ടെത്തി. ടോസ് നേടി സന്ദർശകർ ബാറ്റിങ് തിരഞ്ഞെടുക്കുകയായിരുന്നു.
എയ്ഡൻ മാർക്രം, റീസ ഹെൻഡ്രിക്‌സ് എന്നിവരുടെ അർധ സെഞ്ച്വറികളാണ് ദക്ഷിണാഫ്രിക്കയ്ക്ക് ഭേദപ്പെട്ട സ്‌കോർ സമ്മാനിച്ചത്. മാർക്രം 79 റൺസ് കണ്ടെത്തി. റീസ ഹെൻഡ്രിക്‌സ് 74 റൺസെടുത്തു.
ഡേവിഡ് മില്ലർ പുറത്താകാതെ 35 റൺസെടുത്തു. ഹെയ്ന്റിച് ക്ലാസൻ (30), ജന്നെമൻ മാലൻ (25) എന്നിവരും പിടിച്ചു നിന്നു.
ഇന്ത്യക്കായി മുഹമ്മദ് സിറാജ് മൂന്ന് വിക്കറ്റുകൾ പിഴുതു. വാഷിങ്ടൻ സുന്ദർ, ഷെഹ്ബാസ് അഹ്മദ്, കുൽദീപ് യാദവ്, ശാർദുൽ ഠാക്കൂർ എന്നിവർ ഒരോ വിക്കറ്റുകൾ സ്വന്തമാക്കി.
