എയര്‍ടെല്‍ ഇന്ത്യയിലെ ആദ്യ വോയ്സ് ഓവര്‍ വൈഫൈ സേവനവുമായി രംഗത്ത്. ‘എയര്‍ടെല്‍ വൈഫൈ കോളിങ്’ എന്നാണ് ഇതിന് പേര് നല്‍കിയിരിക്കുന്നത്.
വൈഫൈ നെറ്റ് വര്‍ക്ക് പ്രയോജനപ്പെടുത്തി ഫോണ്‍ വിളി സാധ്യമാക്കുന്ന സംവിധാനമാണിത്. എയര്‍ടെല്‍ വൈഫൈ കോളിങ് ഉപയോഗിക്കാന്‍ പ്രത്യേകം ആപ്പിന്റെ ആവശ്യമില്ല. ഫോണില്‍ തന്നെയുള്ള സെറ്റിങ്സില്‍ മാറ്റം വരുത്തിയാല്‍ ഇത് സാധ്യമാകും.
വൈഫൈ കോളിങിന് എയര്‍ടെല്‍ ചാര്‍ജ് ഈടാക്കില്ല. വോയ്സ് കോളിങ് സേവനത്തിന് കുറഞ്ഞ അളവിലുള്ള ഡാറ്റ മാത്രമേ ഉപയോഗിക്കുകയുള്ളൂ എന്ന് എയര്‍ടെല്‍ പറഞ്ഞു. നിലവില്‍ ഡല്‍ഹിയിലുള്ളവര്‍ക്ക് മാത്രമാണ് ഇപ്പോള്‍ വൈഫൈ കോളിങ് സൗകര്യം ലഭ്യമാകുന്നത്.
ഷാവോമി റെഡ്മി കെ20, റെഡ്മി കെ20 പ്രോ, പോകോ എഫ്, സാംസങ് ഗാലക്സി ജെ6, ഗാലക്സി എ10എസ്, ഗാലക്സി ഓണ്‍6, ഗാലക്സി എം30എസ്, വണ്‍ പ്ലസ് 7 പരമ്പരയിലെ വണ്‍പ്ലസ് 7, 7ടി, 7ടി പ്രോ എന്നീ ഫോണുകളില്‍ എയര്‍ടെല്‍ വൈഫൈ കോളിങ് ലഭ്യമാവും. മറ്റ് സ്മാര്‍ട്ഫോണുകളിലും എയര്‍ടെല്‍ വൈഫൈ കോളിങ് സൗകര്യം എത്തിക്കാനായി മുന്‍നിര സ്മാര്‍ട്ഫോണ്‍ ബ്രാന്റുകളുമായി എയര്‍ടെല്‍ പ്രവര്‍ത്തിച്ചുവരികയാണ്.
