റിയാദ്: സൗദി പ്രോ ലീഗില്‍ കിരീടപോരാട്ടം ശക്തമാക്കി അല്‍ നസര്‍. ഒന്നിനെതിരെ രണ്ട് ഗോളുകള്‍ക്ക് അല്‍ ഫത്തേഹിനെ തോല്‍പ്പിച്ച് അല്‍ നസര്‍ പ്രോ ലീഗ് ടേബിളില്‍ രണ്ടാം സ്ഥാനത്ത് തുടരുകയാണ്. ഒന്നാം സ്ഥാനത്തുള്ള അല്‍ ഹിലാലുമായി നാല് പോയിന്റ് വ്യത്യാസമാണ് അല്‍ നസറിനുള്ളത്.
രണ്ടാം പകുതിയില്‍ ഒട്ടാവിയോയുടെ ഹെഡര്‍ ഗോള്‍ മത്സരവിധിയെഴുതി. മത്സരത്തിന്റെ അവസാന മിനിറ്റുകളില്‍ ക്രിസ്റ്റ്യാനോ റൊണാള്‍ഡോ വീണ്ടും ഗോളിന് അടുത്തെത്തി. എങ്കിലും അല്‍ ഫത്തേഹിന്റെ പ്രതിരോധ മികവ് സൂപ്പര്‍ താരത്തിന് ഗോള്‍ അനുവദിച്ചില്ല.
ആവേശകരമായ ആദ്യ പകുതിയില്‍ ഇരുടീമുകളും ഓരോ ഗോള്‍ വീതം നേടി. അല്‍ നസറിനേക്കാള്‍ നേരിയ മുന്‍തൂക്കം അല്‍ ഫത്തേഹിനുണ്ടായിരുന്നു. 17-ാം മിനിറ്റില്‍ ക്രിസ്റ്റ്യാനോ റൊണാള്‍ഡോയുടെ ഗോളില്‍ അല്‍ നസര്‍ മുന്നിലെത്തി. എന്നാല്‍ 29-ാം മിനിറ്റില്‍ സലേം അല്‍ നജ്ദി സമനില ഗോള്‍ നേടി.
