അല്ലു അര്‍ജുന്റെ അനുജന്‍ മോഹന്‍ലാല്‍ ചിത്രത്തിലൂടെ മലയാളത്തില്‍ അരങ്ങേറ്റം കുറിക്കുന്നു.
കേരളത്തില്‍ ഏറെ ആരാധകരുള്ള താരമാണ് അല്ലു അര്‍ജുന്‍. അല്ലുവിന്റെ കേരളത്തിലെ എത്ര ആരാധകര്‍ക്ക് അല്ലു സിരീഷിനെ അറിയാം എന്നറിയില്ല.
ബാലതാരമായി സിനിമയിലെത്തിയ സിരീഷ് അടുത്തിടെയിറങ്ങിയ ‘ശ്രീരാസ്തു ശുഭമസ്തു’ ഉള്‍പ്പെടെ മൂന്നേമൂന്ന് ചിത്രങ്ങളിലേ അഭിനയിച്ചിട്ടുള്ളൂ. എല്ലാം തെലുങ്കില്‍.
ആദ്യചിത്രമായ ‘ഗൗരവം’ തെലുങ്കിനൊപ്പം തമിഴിലും പ്രദര്‍ശനത്തിനെത്തി എന്നുമാത്രം. ഇപ്പോഴിതാ മലയാളത്തില്‍ അഭിനയിക്കാനൊരുങ്ങുകയാണ് സിരീഷ്. അതും ചേട്ടന്‍ അല്ലു അര്‍ജുന്റെ പ്രിയനടനൊപ്പം.
മേജര്‍ രവിയുടെ ‘1971 ബിയോണ്ട് ബോര്‍ഡേഴ്‌സാ’ണ് ചിത്രം. മലയാളത്തില്‍ അഭിനയിക്കാന്‍ ആഗ്രഹമുണ്ടായിരുന്നെന്നും അത് മോഹന്‍ലാലിനൊപ്പമുള്ള ഒരു ചിത്രത്തിലൂടെ ആയതില്‍ സന്തോഷമുണ്ടെന്നും അല്ലു സിരീഷ് പറയുന്നു.
മോഹന്‍ലാല്‍ സാറിനൊപ്പം ഒരു മുഴുനീള വേഷത്തില്‍ അഭിനയിക്കാന്‍ അവസരം ലഭിച്ചതില്‍ വലിയ സന്തോഷം. ഒരു ടാങ്ക് കമാന്ററാണ് ചിത്രത്തില്‍ എന്റെ കഥാപാത്രം. ശത്രുരാജ്യത്തെ താറടിച്ച് കാണിക്കുന്ന ചിത്രമല്ല ഇത് എന്നതാണ് ഈ ചിത്രത്തിലേക്ക് എന്നെ അടുപ്പിച്ച മറ്റൊരു ഘടകം. മനുഷ്യവികാരങ്ങളെക്കുറിച്ചും സംസാരിക്കുന്ന ഒരു സിനിമയാണിത്.
‘ബാഹുബലി’ താരം റാണ ദഗ്ഗുബട്ടി അവതരിപ്പിക്കുമെന്ന് പറയപ്പെട്ടിരുന്ന കഥാപാത്രത്തെയാണ് അല്ലു സിരീഷ് അവതരിപ്പിക്കുന്നത്. ‘1971 ബിയോണ്ട് ബോര്‍ഡേഴ്‌സി’ല്‍ താന്‍ അഭിനയിക്കുമെന്ന് നേരത്തേ പുറത്തുവന്ന വാര്‍ത്തകള്‍ റാണ നിഷേധിച്ചിരുന്നു.
എന്നാല്‍ റാണയെ സമീപിച്ചിരുന്നെന്നും ‘ബാഹുബലി 2’ ചിത്രീകരണം നീണ്ടുപോയതാണ് അദ്ദേഹത്തിന് ‘1971’ ല്‍ അഭിനയിക്കുന്നതിന് തടസമായതെന്നും മേജര്‍ രവി പറഞ്ഞു.
മോഹന്‍ലാല്‍ മൂന്ന് ഗെറ്റപ്പുകളിലും ഡബിള്‍ റോളിലുമെത്തുന്ന മേജര്‍ രവി ചിത്രമാണ് 1971 ബിയോണ്ട് ബോര്‍ഡേഴ്‌സ്. രാജസ്ഥാന്‍, കാശ്മീര്‍, പഞ്ചാബ് ഉഗാണ്ട എന്നിവിടങ്ങളില്‍ ചിത്രീകരിക്കുന്ന സിനിമ രാജ്യാന്തര സ്വഭാവമുള്ള വാര്‍ മുവീ ആയിരിക്കുമെന്നാണ് സൂചന.
1971 ലെ ഇന്ത്യാപാക് യുദ്ധകാലത്ത് നടന്ന യഥാര്‍ത്ഥ സംഭവങ്ങളെ ആസ്പദമാക്കിയാണ് ചിത്രം. മേജര്‍ മഹാദേവനായും പിതാവ് മേജര്‍ സഹദേവനായുമാണ് മോഹന്‍ലാല്‍ അഭിനയിക്കുന്നത്.
മഹാദേവന്‍ എന്ന സൈനിക ഉദ്യോഗസ്ഥനായി മോഹന്‍ലാല്‍ നാലാം തവണയാണ് മേജര്‍ രവി ചിത്രത്തില്‍ കഥാപാത്രമാകുന്നത്. മേജര്‍ രവിയുടെ ആദ്യ ചിത്രം കീര്‍ത്തി ചക്രയിലും പിന്നീട് വന്ന കുരുക്ഷേത്ര, കാണ്ഡഹാര്‍ എന്നീ സിനിമകളിലും മോഹന്‍ലാല്‍ മഹാദേവന്റെ റോളിലായിരുന്നു.
റെഡ് റോസ് എന്റര്‍ടെയിന്‍മെന്റിന്റെ ബാനറില്‍ ഹനീഫ് മുഹമ്മദാണ് നിര്‍മാണം.
