പത്തനംതിട്ട : ഭര്‍ത്താവില്ലാത്ത സമയത്ത് വീട്ടില്‍ കയറി യുവതിയെ പീഡിപ്പിക്കാന്‍ ശ്രമിച്ച കേസില്‍ ആംബുലന്‍സ് ഡ്രൈവര്‍ അറസ്റ്റില്‍. അടൂര്‍ പന്നിവിഴ കാറ്റാടിയില്‍ വിജേഷ് (സച്ചു-40) ആണ് ഏനാത്ത് പൊലീസിന്റെ പിടിയിലായത്. ജൂണ്‍ 19ന് പുലര്‍ച്ചെ 2.30 നാണ് കേസിനാസ്പദമായ സംഭവം. നഴ്‌സ് ആയ യുവതിയെ ആംബുലന്‍സ് ഡ്രൈവറായ പ്രതിക്ക് മുന്‍ പരിചയമുണ്ട്.
സംഭവ ദിവസം പരാതിക്കാരിയുടെ ഭര്‍ത്താവ് വീട്ടില്‍ ഇല്ലെന്ന് മനസിലാക്കിയാണ് ഇയാള്‍ രാത്രിയില്‍ അവിടെ എത്തിയത്. ഇയാള്‍ പുറത്തുനിന്ന് ഫോണ്‍ വിളിച്ച് കതക് തുറക്കാന്‍ ആവശ്യപ്പെട്ടെങ്കിലും യുവതി തയ്യാറായില്ല. തുടര്‍ന്ന് ഭീഷണി മുഴക്കിയതോടെ ഭയന്ന യുവതി വാതില്‍ തുറക്കാന്‍ നിര്‍ബന്ധിതയായി.
വീടിനകത്ത് കയറിയ പ്രതി യുവതിയെ കടന്നുപിടിക്കുകയും പീഡിപ്പിക്കാന്‍ ശ്രമിക്കുകയുമായിരുന്നു. യുവതി ബഹളം കൂട്ടിയതോടെ പ്രതി ഓടി രക്ഷപ്പെട്ടു. പൊലീസില്‍ പരാതി നല്‍കിയതിന് പിന്നാലെ ഒളിവില്‍ പോയെങ്കിലും ഇയാളെ പിടികൂടുകയായിരുന്നു.
