കൊച്ചി: സംസ്ഥാനത്ത് പാര്‍ട്ടി പ്രവര്‍ത്തനം ശക്തിപ്പെടുത്തുന്നതിന്റെ ഭാഗമായി ബിജെപി ദേശീയ അധ്യക്ഷന്‍ അമിത് ഷാ കേരളത്തിലെത്തി.
പാര്‍ലമെന്റ് തെരഞ്ഞെടുപ്പിന് മുന്നോടിയായി സ്വീകരിക്കേണ്ട തന്ത്രങ്ങളും പ്രചാരണ വിഷയങ്ങളും
അമിത് ഷാ ഇന്ന് ബിജെപി നേതാക്കളുമായി ചര്‍ച്ച ചെയ്യും. താഴെത്തട്ട് മുതല്‍ പാര്‍ട്ടിയെ ശക്തിപ്പെടുത്തുന്നതിനുള്ള കര്‍മ്മ പദ്ധതികളും യോഗം ആവിഷ്‌കരിക്കും.
ഉച്ചയ്ക്ക് 2.30 മുതല്‍ പാലാരിവട്ടം റിനൈ ഹോട്ടലില്‍ ചേരുന്ന എന്‍ ഡി എ യോഗത്തിലും അമിത് ഷാ പങ്കെടുക്കും. ദേശീയ ജനാധിപത്യ സഖ്യം കേരളം ഘടകം വിപുലീകരിക്കുന്നതിനെക്കുറിച്ച് അമിത് ഷായുടെ സാന്നിധ്യത്തില്‍ ചര്‍ച്ച ചെയ്യും.
വൈകിട്ട് നാലു മണിക്ക് കലൂരിലെ റിന്യുവല്‍ സെന്ററില്‍ ക്രൈസ്തവ സഭാ മേലധ്യക്ഷന്മാരുമായി അമിത് ഷാ ചര്‍ച്ച നടത്തും. വൈകിട്ട് 5.15 ന് കലൂര്‍ എജെ ഹാളില്‍ ബിജെപിയുടെ ജനപ്രതിനിധികളെ കാണും. തുടര്‍ന്ന് 6.30 റിനൈ ഹോട്ടലില്‍ ബിജെപി യുടെ ഓഫീസ് നിര്‍മാണ കമ്മിറ്റി യോഗം, രാത്രി 8.30 മുതല്‍ ക്ഷണിക്കപ്പെട്ട അതിഥികളുമായി കൂടിക്കാഴ്ച. ശനിയാഴ്ച തിരുവനന്തപുരത്തേക്ക് പോകുന്ന അമിത് ഷാ ബിജെപി യുടെ ബൂത്ത് കമ്മിറ്റി യോഗത്തിലും സംസ്ഥാന ഭാരവാഹി യോഗത്തിലും പങ്കെടുക്കും.
