തിരുവനന്തപുരം : സി.പി.ഐയ്‌ക്കെതിരെ ആഞ്ഞടിച്ച് സിപിഎം സംസ്ഥാന സെക്രട്ടേറിയറ്റ് അംഗം ആനത്തലവട്ടം ആനന്ദന്‍ രംഗത്ത്.
ചാമ്പ്യന്‍മാര്‍ തങ്ങളാണെന്നും സര്‍ക്കാര്‍ മോശമാണെന്ന് വരുത്തി തീര്‍ക്കാനുള്ള ശ്രമമാണ് സിപിഐയ്‌ക്കെന്ന് ആനത്തലവട്ടം ആനന്ദന്‍ ആരോപിച്ചു.
സിപിഐക്ക് ഒരിക്കലും ഒരു ചുക്കും ചെയ്യാന്‍ സാധിക്കില്ലന്നും, കൂടെ നടന്നിട്ട് തോളില്‍ കയറിയിരുന്ന് ചെവി കടിക്കുന്ന പണിയാണ് സിപിഐ നടത്തുന്നതെന്നും അദ്ദേഹം തുറന്നടിച്ചു.
പാര്‍ലമെന്റ് തിരഞ്ഞെടുപ്പില്‍ സിപിഐ ഏത് മുന്നണിയില്‍ പോകുമെന്നറിയില്ലന്നും ആദ്ദേഹം പറഞ്ഞു.
വലിയ വായില്‍ സംസാരിക്കുന്ന സിപിഐ സര്‍ക്കാരിനെ ക്ഷീണിപ്പിക്കാന്‍ ശ്രമിക്കുന്നുവെന്നും അദ്ദേഹം കുറ്റപ്പെടുത്തി.
സോളാര്‍ സമരം അവസാനിപ്പിച്ചത് ഒത്തുകളിയാണെന്ന് സിപിഐ ആരോപിച്ചു. കമ്മീഷന്‍ റിപ്പോര്‍ട്ട് പുറത്തുവന്നപ്പോള്‍ സിപിഐ എന്തു പറയുന്നുവെന്നും അദ്ദേഹം ചോദിച്ചു.
തോമസ് ചാണ്ടിയെ പിണറായി എന്തിന് സംരക്ഷിക്കണം ? ചാണ്ടിയേക്കാള്‍ ജനസമ്പത്തുള്ള പാര്‍ട്ടിയാണ് സിപിഎമ്മെന്നും ആനത്തലവട്ടം ആനന്ദന്‍ വ്യക്തമാക്കി.
അതേസമയം തോമസ് ചാണ്ടി പ്രശ്‌നത്തില്‍ സിപിഎം-സി.പി.ഐ പോര് കൂടുതല്‍ രൂക്ഷമായിരിക്കുന്ന സാഹചര്യത്തില്‍ ഭിന്നത അണികള്‍ക്കിടയിലേക്കും വ്യാപിച്ചിട്ടുണ്ട്.
സി.പി.ഐയെ മുന്നണിയില്‍ നിന്നും പുറത്താക്കണമെന്നാണ് സിപിഎം അണികള്‍ക്കിടയിലെ പൊതു വികാരം.
