സ്റ്റോറി ടാക്കീസിന്റെ ബാനറില്‍ സൗമ്യ ആര്‍ നിര്‍മ്മിച്ച് നവാഗതനായ രാജീവ് വര്‍ഗീസ് സംവിധാനം ചെയുന്ന ‘അങ്ങനെ ഞാനും പ്രേമിച്ചു’ ചിത്രത്തിന്റെ ട്രെയിലര്‍ പുറത്തിറങ്ങി. നാടക അക്കാദമിയില്‍ പഠിക്കുന്ന നാല് ചെറുപ്പക്കാരുടെ ഇടയിലേക്ക് ആണ്‍കുട്ടിയെപോലെയിരിക്കുന്ന ഒരു പെണ്‍കുട്ടി കടന്നുവരുന്നതും ഇവരുടെ ജീവിതത്തില്‍ ഉണ്ടാകുന്ന മാറ്റങ്ങളുമാണ് ചിത്രത്തിന്റെ പ്രമേയം.
ജീവ, സൂര്യകാന്ത്, ജീവന്‍, വിഷ്ണു നമ്പ്യാര്‍, ശിവകാമി, സ്‌നേഹ എന്നീ പുതുമുഖങ്ങളാണ് പ്രധാന കഥാപാത്രങ്ങളായി അഭിനയിക്കുന്നത്. ഇവരെ കൂടാതെ സിദ്ധിഖ്, മേജര്‍ രവി, നീന കുറുപ്, നിര്‍മല്‍ പാലാഴി, അങ്കമാലി ഫെയിം സിനോജ് എന്നിവരും അണിനിരക്കുന്നു.
ഹിഷാം അബ്ദുല്‍ വാഹബാണ് സംഗീത സംവിധാനം. ഹരിനാരായണും നിഷാദും ചേര്‍ന്നാണ് വരികള്‍ എഴുതിയിരിക്കുന്നത്. വിജയ് യേശുദാസ്,നജീം അര്‍ഷാദ് എന്നിവരാണ് ഗാനങ്ങള്‍ ആലപിച്ചിരിക്കുന്നത്. ലൈഫ് ഓഫ് ജോസ്‌കുട്ടി എന്ന ചിത്രത്തിന്റെ ഛായാഗ്രാഹകന്‍ രവി ചന്ദ്രനാണ് ഈ ചിത്രത്തിന്റെയും ക്യാമറ ചലിപ്പിക്കുന്നത്. റെക്‌സണ്‍ ജോസഫ് ആണ് എഡിറ്റര്‍.
