ആന്‍ഡ്രോയ്ഡിനെ വീണ്ടും കടന്നാക്രമിച്ച്‌ ആപ്പിള്‍ സി.ഇ.ഒ ടിം കുക്ക്. ആപ്പുകള്‍ സൈഡ്ലോഡ് ചെയ്യാന്‍ അനുവദിക്കുന്ന ആന്‍ഡ്രോയ്ഡ് രീതിയെയാണ് കുക്ക് ന്യൂയോര്‍ക് ടൈംസിന്‍റെ ഡീല്‍ബുക് സമ്മിറ്റില്‍ വെച്ച്‌ വിമര്‍ശിച്ചത്.
‘നിങ്ങള്‍ക്ക് ആപ്പുകള്‍ സൈഡ്ലോഡ് ചെയ്യണമെങ്കില്‍ ആന്‍ഡ്രോയ്ഡ് ഫോണുകള്‍ വാങ്ങിക്കോളൂ..’ എന്ന് അദ്ദേഹം പറഞ്ഞു. ഔദ്യോഗിക ആപ്പ് സ്റ്റോറുകളില്‍ നിന്നല്ലാതെ, തേര്‍ഡ് പാര്‍ട്ടി ആപ്പുകള്‍ പുറത്തുനിന്നും ഡൗണ്‍ലോഡ് ചെയ്ത് ഉപയോഗിക്കുന്നതിനെയാണ് സൈഡ്ലോഡിങ് എന്ന് പറയുന്നത്.
‘ഒരു കാര്‍ നിര്‍മാതാവ് ഉപഭോക്താവിനോട് കാറില്‍ എയര്‍ബാഗും സീറ്റ് ബെല്‍റ്റുകളും ഇടരുതെന്ന്’ പറയുന്നതിനോടാണ് ടിം കുക്ക് സൈഡ്ലോഡിങ്ങിനെ താരതമ്യപ്പെടുത്തിയത്. ഏറെ അപകട സാധ്യതയുള്ളതാണ് അതെന്നും അദ്ദേഹം ഓര്‍മപ്പെടുത്തി. ആപ് സ്റ്റോറിന് പുറത്തുനിന്നും ആപ്പുകള്‍ ഡൗണ്‍ലോഡ് ചെയ്ത് ഉപയോഗിക്കുന്നത് ഏറെ സുരക്ഷാ പ്രശ്നങ്ങള്‍ക്ക് കാരണമാകുമെന്നും യൂസര്‍മാരുടെ ഡാറ്റ നഷ്ടപ്പെടുന്നതടക്കമുള്ള അപകടം ക്ഷണിച്ചുവരുത്തുമെന്നുമാണ് ആപ്പിള്‍ കാലങ്ങളായി മുന്നറിയിപ്പ് നല്‍കുന്നത്.
എന്നാല്‍, ആന്‍ഡ്രോയ്ഡ് പ്ലാറ്റ്ഫോമില്‍ ഇപ്പോഴും പ്ലേസ്റ്റോറിന് പുറമേ, നിരവധി തേര്‍ഡ് പാര്‍ട്ടി ആപ്ലിക്കേഷന്‍ സ്റ്റോറുകള്‍ ലഭ്യമാണ്. അവയില്‍ നിന്ന് ആളുകള്‍ ആപ്പുകള്‍ ഡൗണ്‍ലോഡ് ചെയ്ത് ഉപയോഗിക്കുന്നുമുണ്ട്.
