ന്യൂഡല്‍ഹി: നിരവധി മോഷണ കേസുകളിൽ മുഖ്യസൂത്രധാരനായ മുന്‍ റിയാലിറ്റി ഷോ താരത്തെ പൊലീസ് അറസ്റ്റ് ചെയ്തു.
അഞ്ചു വര്‍ഷമായി തേടിക്കൊണ്ടിരുന്ന പ്രതിയെയാണ് കഴിഞ്ഞ ദിവസം പൊലീസ് കസ്റ്റഡിയിലെടുത്ത്.
ഇന്ത്യന്‍ ഐഡള്‍ റിയാലിറ്റി ഷോ താരവും ത്വായ്‌ക്കോണ്ട സ്വര്‍ണ മെഡല്‍ ജേതാവുമായ ഫൈറ്റര്‍ എന്ന് വിളിക്കുന്ന സുരാജാണ് പിടിയിലായത്.
സുരാജിനൊപ്പം സഹായിയായ അനില്‍ എന്നയാളേയും അറസ്റ്റ് ചെയ്തിട്ടുണ്ട്. ഇരുവരുടേയും പക്കല്‍ നിന്നും പെപ്പര്‍ സ്പ്രേ, മോഷണത്തിന് ഉപയോഗിക്കുന്ന ഉപകരണങ്ങള്‍ തുടങ്ങിയവയും പൊലീസ് കണ്ടെടുത്തു.
ഒക്ടബോര്‍ 21ന് ഔട്ടര്‍ ഡല്‍ഹിയിലെ രന്‍ഹോലയില്‍ നടത്തിയ മോഷണത്തിനു പിന്നാലെയാണ് പൊലീസ്
സൂരജിനേയും സംഘത്തേയും നിരീക്ഷിച്ചു തുടങ്ങിയത്.
മോഷ്ടാക്കള്‍ തങ്ങളെ തോക്കിന്‍ മുനയില്‍ നിര്‍ത്തി സ്വര്‍ണവും പണവും മോഷ്ടിച്ചു, മോഷണത്തിനു പിന്നാലെ തങ്ങള്‍ക്ക് നേരെ പെപ്പര്‍ സ്പ്രേ ഉപയോഗിച്ചതായും പരാതിക്കാര്‍ ചൂണ്ടിക്കാട്ടിയിരുന്നു.
തുടര്‍ന്ന് നടത്തിയ അന്വേഷണത്തിലാണ് സൂരജിനെയും സഹായിയേയും പിടികൂടുന്നത്. ഇരുവര്‍ക്കും ഒരു ഡസനിലധികം മോഷണക്കേസുകളില്‍ പങ്കുണ്ടെന്ന് ഉദ്യോഗസ്ഥര്‍ വ്യക്തമാക്കി.
അനുമതിയില്ലാതെ തോക്ക് കൈവശം വെച്ചതിനും ഇവര്‍ക്കെതിരെ കേസ് ഉണ്ട്.
ഉത്തംനഗര്‍ സ്വദേശിയാണ് മുന്‍ ഇന്ത്യന്‍ ഐഡള്‍ റിയാലിറ്റി ഷോ താരമായ സൂരജ്.
