ലണ്ടന്‍: എഫ്എ കപ്പ് കിരീടം സ്വന്തമാക്കി ആഴ്സണല്. വെംബ്ലി സ്റ്റേഡിയത്തില്‍ നടന്ന എഫ്എ കപ്പ് ഫുട്‌ബോള്‍ ഫൈനലില്‍ ആഴ്സണല് 2-1ന് ചെല്‍സിയെ തകര്‍ത്തു. സീസണിലെ രണ്ടാം കിരീടമെന്ന ചെല്‍സിയുടെ മോഹമാണ് ആഴ്സണല് തകര്‍ത്തത്.
അലക്‌സിസ് സാഞ്ചസ് (4) ആഴ്‌സണലിനെ മുന്നിലെത്തിച്ചു. ഡിയേഗോ കോസ്റ്റ 76-ാം മിനിറ്റില്‍ ഗോള്‍ മടക്കിയതോടെ മത്സരം നീളുമെന്നു തോന്നിച്ചു. എന്നാല്‍ ആരോണ്‍ റാംസെ ആഴ്‌സണലിന്റെ രക്ഷകനായി 79-ാം മിനിറ്റില്‍ വിജയ ഗോള്‍ സ്വന്തമാക്കി.
കിരീടത്തോടെ സീസണ്‍ പൂര്‍ത്തിയാക്കാനിറങ്ങിയ ഇരുടീമും ആദ്യം മുതലേ ആക്രമണ മൂഡിലായിരുന്നു. എന്നാല്‍ നാലാം മിനിറ്റില്‍ ആഴ്‌സണലിന്റെ വക ഗോളെത്തി. അലക്‌സിസ് സാഞ്ചസാണ് ഗോൾ നേടിയത്. രണ്ടാം പകുതിയില്‍ ചെല്‍സിയാണ് കൂടുതല്‍ മുന്നേറ്റം നടത്തിയത്. എന്നാല്‍ രണ്ടാം മഞ്ഞക്കാര്‍ഡ് കണ്ട് വിക്ടര്‍ മോസസ് പുറത്തായത് നീലകുപ്പായക്കാരുടെ താളം തെറ്റിച്ചു.
ചെല്‍സിയുടെ നിരന്തര മുന്നേറ്റത്തിന്‍റെ ഫലം 76-ാം മിനിറ്റിലെത്തി. ഡിയേഗോ കോസ്റ്റ സമനില പിടിച്ചു. വില്യന്റെ പാസില്‍ നിന്നായിരുന്നു ഗോള്‍. 79-ാം മിനിറ്റില്‍ റാംസെ പീരങ്കിപ്പടയുടെ വിജയം ഉറപ്പിച്ച് ചെല്‍സിയുടെ വല കുലുക്കി.
