ദുബായ്: ഏഷ്യ കപ്പ് ക്രിക്കറ്റിന് ഇന്ന് തുടക്കം. ടൂര്‍ണമെന്റിലെ ആദ്യ മത്സരത്തില്‍ മുന്‍ ചാമ്പ്യന്മാരായ ശ്രീലങ്ക നിലവിലെ റണ്ണേഴ്‌സ്അപ്പായ ബംഗ്ലാദേശിനെ നേരിടും. വൈകീട്ട് അഞ്ചുമുതല്‍ ദുബായ് അന്താരാഷ്ട്ര ക്രിക്കറ്റ് സ്റ്റേഡിയത്തിലാണ് മത്സരം നടക്കുന്നത്. ബി ഗ്രൂപ്പിലാണ് ഇരു ടീമുകളുടെയും സ്ഥാനം. അഫ്ഗാനിസ്ഥാനാണ് ഗ്രൂപ്പിലെ മൂന്നാമത്തെ ടീം. ആറ് ടീമുകള്‍ രണ്ടു ഗ്രൂപ്പുകളിലായാണ് മത്സരിക്കുന്നത്.
ചൊവ്വാഴ്ച നിലവിലെ ചാമ്പ്യന്മാരായ ഇന്ത്യ ഹോങ്കോങ്ങിനെ നേരിടും. ബുധനാഴ്ചയാണ് ക്രിക്കറ്റ് ലോകം കാത്തിരിക്കുന്ന ഇന്ത്യ- പാക്കിസ്ഥാന്‍ പോരാട്ടം. സ്വന്തം നാട്ടില്‍ ദക്ഷിണാഫ്രിക്കയ്‌ക്കെതിരെ നടന്ന ഏകദിന പരമ്പര അടിയറവ് പറഞ്ഞാണ് ലങ്കയുടെ ഏഷ്യ കപ്പിലേക്കുള്ള വരവ്. ഏഷ്യ കപ്പില്‍ കഴിഞ്ഞ സീസണില്‍ ഇന്ത്യയോട് തോറ്റാണ് ബംഗ്ലാദേശ് കിരീടം കൈവിട്ടത്.
