തലശ്ശേരി: തലശ്ശേരിയില്‍ യുഡിഎഫ് സ്ഥാനാര്‍ത്ഥി എപി അബ്ദുള്ളക്കുട്ടിക്കു നേരെ കയ്യേറ്റ ശ്രമമെന്നു പരാതി. തലശ്ശേരി ചെമ്പാട് നിന്നാണ് കയ്യേറ്റ ശ്രമമെന്നാണ് പരാതി.
നേരത്തെ തെരഞ്ഞെടുപ്പ് പ്രചാരണത്തിനിടെ അബ്ദുള്ളക്കുട്ടിയുടെ ദേഹത്ത് അഞ്ജാതന്‍ മുറുക്കിത്തുപ്പിയിരുന്നു. കയ്യേറ്റ ശ്രമവും ഉണ്ടായി. വടക്കുമ്പാട് പാറക്കെട്ടിനു സമീപം വോട്ടഭ്യര്‍ത്ഥിക്കുന്നതിനിടെയാണ് ഒരാള്‍ വായില്‍ ചവച്ചുകൊണ്ടിരുന്ന പാന്‍പരാഗ് ദേഹത്തേക്ക് തുപ്പിയത്. പിന്നീട് ഷര്‍ട്ടില്‍ പിടിച്ചുവലിക്കുകയും അസഭ്യം പറയുകയും ചെയ്തു. അണികള്‍ ഇടപെട്ടതിനെ തുടര്‍ന്നാണ് സംഭവം ശാന്തമായത്.
ഇതിനു കുറച്ചു മാസങ്ങള്‍ക്കു മുന്‍പേ അബ്ദുള്ളക്കുട്ടിയെ ചീത്തവിളിച്ചുവെന്ന പേരില്‍ നാല് സിപിഐഎം പ്രവര്‍ത്തകരെ പൊലീസ് കസ്റ്റഡിയിലെടുത്തിരുന്നു. സിപിഐഎമ്മിന്റെ ശക്തികേന്ദ്രങ്ങളില്‍ നടത്തിയ പ്രചാരണത്തിനിടയിലായിരുന്നു അബ്ദുള്ളക്കുട്ടിക്കു നേരെ അസഭ്യവര്‍ഷവും കയ്യേറ്റ ശ്രമവും.
