ദില്ലി: ഇന്ത്യക്കെതിരായ ദില്ലി ക്രിക്കറ്റ് ടെസ്റ്റില്‍ ഓസ്ട്രേലിയ ഒന്നാം ഇന്നിംഗ്സില്‍ 263ന് പുറത്ത്. ടോസ് നേടി ക്രീസിലിറങ്ങിയ ഓസ്ട്രേലിയ നല്ല തുടക്കത്തിനുശേഷം തകരുകയയായിരുന്നു. 81 റണ്‍സെടുത്ത ഉസ്മാന്‍ ഖവാജയും 72 റണ്‍സുമായി പുറത്താകാതെ നിന്ന പീറ്റര്‍ ഹാന്‍ഡ്സ്കോംബും മാത്രമെ ഓസീസ് നിരയില്‍ പൊരുതിയുള്ളു. ഇന്ത്യക്കായി മുഹമ്മദ് ഷമി നാലും അശ്വിന്‍ ജഡേജ എന്നിവര്‍ മൂന്ന് വിക്കറ്റ് വീതവും വീഴ്ത്തി.
ഒന്നാം ദിനം മറുപടി ബാറ്റിംഗ് തുടങ്ങിയ ഇന്ത്യ സ്റ്റംപെടുക്കുമ്പോള്‍ വിക്കറ്റ് നഷ്ടമില്ലാതെ 21 റണ്‍സെന്ന നിലയിലാണ്. 13 റണ്‍സോടെ ക്യാപ്റ്റന്‍ രോഹിത് ശര്‍മയും നാലു റണ്ണുമായി കെ എല്‍ രാഹുലും ക്രീസില്‍. 10 വിക്കറ്റ് ശേഷിക്കെ ഓസീസിന്റെ ഒന്നാം ഇന്നിംഗ്സിനൊപ്പമെത്താന്‍ ഇന്ത്യക്കിനിയും 242 റണ്‍സ് കൂടി വേണം.
തുടക്കത്തില്‍ ടോസിലെ ഭാഗ്യം ബാറ്റിംഗിലും ഓസീസിനെ തുണച്ചപ്പോള്‍ ഓപ്പണിംഗ് വിക്കറ്റില്‍ ഖവാജയും വാര്‍ണറും ചേര്‍ന്ന് അര്‍ധസെഞ്ചുറി കൂട്ടുകെട്ടുയര്‍ത്തി ഓസ്ട്രേലിയക്ക് പ്രതീക്ഷ നല്‍കി. ആദ്യ റണ്ണെടുക്കാന്‍ 21 പന്തുകള്‍ നേരിട്ട വാര്‍ണര്‍ ഒടുവില്‍ ടീം സ്കോര്‍ 50ല്‍ എത്തിയതിന് പിന്നാലെ ഷമിയുടെ പന്തില്‍ വിക്കറ്റിന് പിന്നില്‍ ശ്രീകര്‍ ഭരത്തിന് ക്യാച്ച് നല്‍കി മടങ്ങി. 44 പന്തില്‍ 15 റണ്‍സായിരുന്നു വാര്‍ണറുടെ സംഭാവന.
വണ്‍ ഡൗണായി എത്തിയ മാര്‍നസ് ലാബുഷെയ്ന്‍ നല്ല തുടക്കമിട്ടു. അശ്വിനും ജഡേജക്കുമെതിരെ റിവേഴ്സ് സ്വീപ്പുമായി ഖവാജയും തകര്‍പ്പന്‍ ഷോട്ടുകളുമായി ലാബുഷെയ്നും ക്രീസിലുറച്ചതോടെ ഓസീസ് 91-1 എന്ന മികച്ച നിലയിലെത്തി. എന്നാല്‍ ലഞ്ചിന് തൊട്ടു മുമ്പ് ലാബുഷെയ്നിനെ(18) വിക്കറ്റിന് മുന്നില്‍ കുടുക്കിയ അശ്വിന്‍ അതേ ഓവറില്‍ സ്റ്റീവ് സ്മിത്തിനെ(0) വിക്കറ്റിന് പിന്നില്‍ ശ്രീകര്‍ ഭരത്തിന്റെ കൈകളിലെത്തിച്ച് ഓസീസിനെ ഞെട്ടിച്ചു.
ലഞ്ചിന് പിരിയുമ്പോള്‍ 95-3 എന്ന സ്കോറില്‍ പതറിയ ഓസീസിന് പിന്നീട് ലഞ്ചിനുശേഷം ട്രാവിസ് ഹെഡ്ഡിന്റെ(12) വിക്കറ്റ് നഷ്ടമായി 108-4ലേക്ക് വീണു. എന്നാല്‍ ഉസ്മാന്‍ ഖവാജയും(81), പീറ്റര്‍ ഹാന്‍ഡ്സ്കോംബും പൊരുതിയതോടെ ഓസീസിന് വീണ്ടും പ്രതീക്ഷയായായി. ചായക്കുശേഷം ഉസ്മാന്‍ ഖവാജയെ കെ എല്‍ രാഹുല്‍ തകര്‍പ്പന്‍ ക്യാച്ചിലൂടെ മടക്കിയതിന് പിന്നാലെ അലക്സ് ക്യാരിയെയും(0) നഷ്ടമായതോടെ 168/6 എന്ന സ്കോറില്‍ ഓസീസ് പതറി.
ഓസീസ് വാലറ്റത്തെ എളുപ്പം ചുരുട്ടിക്കൂട്ടാമെന്ന ഇന്ത്യന്‍ പ്രതീക്ഷ തെറ്റിച്ച് ഹാന്‍ഡ്സ്കോംബിനൊപ്പം കമിന്‍സ് പ്രതിരോധിച്ചു നിന്നു. ഇരുവരും ചേര്‍ന്ന് അര്‍ധസെഞ്ചുറി കൂട്ടുകെട്ടുയര്‍ത്തി ഓസീസിനെ 200 കടത്തി. ഏഴാം വിക്കറ്റില്‍ 59 റണ്‍സ് കൂട്ടിച്ചേര്‍ത്തശേഷം ചായക്ക് പിന്നാലെ 33 റണ്‍സെടുത്ത കമിന്‍സിനെ ജഡേജ വിക്കറ്റിന് മുന്നില്‍ കുടുക്കി. അതേ ഓവറില്‍ ടോഡ് മര്‍ഫിയെ ബൗള്‍ഡാക്കി ജഡേജ തകര്‍ച്ചക്ക് വേഗം കൂട്ടി.
നേഥന്‍ ലിയോണിനെ(10) കൂട്ടുപിടിച്ച് ഹാന്‍ഡ്‌സ്കോംബ് ഓസീസിനെ 250 കടത്തി. എന്നാല്‍ ലിയോണിനെയും(10) അവസാന ബാറ്ററായ കുനെമാന്നെയും(6) ബൗള്‍ഡാക്കി ഷമി ഓസീസ് ഇന്നിംഗ്സിന് തിരശീലയിട്ടു.
