ഡല്‍ഹി: ബോളിവുഡ് താരം അമിതാഭ് ബച്ചന്റെ ആരോഗ്യത്തില്‍ ആശങ്കപ്പെടാനില്ലെന്നും അദ്ദേഹം സുരക്ഷിതനാണെന്നും ഭാര്യയും രാജ്യസഭാ എംപിയുമായ ജയാ ബച്ചന് വ്യക്തമാക്കി.
‘അമിത്ജിയുടെ ആരോഗ്യനില ഇപ്പോള്‍ സുരക്ഷിതമാണ്. അല്‍പം വേദനയുണ്ടെന്നത് ഒഴിച്ച് നിര്‍ത്തിയാല്‍ ആശങ്കപ്പെടാനായി ഒന്നുമില്ലെന്നാണ് ജയാബച്ചന്‍ മാധ്യമങ്ങളോട് വ്യക്തമാക്കിയത്.
നേരത്തെ ശാരീരികമായ ബുദ്ധിമുട്ടുണ്ടായ കാര്യം ബച്ചന് തന്നെയാണ് സമൂഹമാധ്യമത്തിലൂടെ ആരാധകരെ അറിയിച്ചത്. അതേസമയം, ഇപ്പോള്‍ വിശ്രമത്തിലാണെന്നും വേദനയില്ലാതെ വിജയമില്ലെന്നും ബച്ചന് ബ്ലോഗില്‍ കുറിച്ചിരുന്നു.
ജോധ്പുരില്‍ തഗ്‌സ് ഓഫ് ഹിന്ദുസ്ഥാന്‍ എന്ന ചിത്രത്തിന്റെ ചിത്രീകരണത്തിനിടെയായിരുന്നു താരത്തിന് ദേഹാസ്വാസ്ഥ്യം അനുഭവപ്പെട്ടത്. ഇതിനെ തുടര്‍ന്ന് ഡോക്ടര്‍മാരുടെ സംഘം ജോധ്പൂരിലേക്ക് പുറപ്പെട്ടിരുന്നു.
ആറുമാസത്തോളമായി വിജയ് കൃഷ്ണ ആചാര്യയുടെ തഗ്‌സ് ഓഫ് ഹിന്ദുസ്ഥാന്റെ ഷൂട്ടിങ്ങ് തിരക്കുകളിലായിരുന്നു ബച്ചന്. തുടരെയുള്ള ഷൂട്ടിങ്ങാണ് ആരോഗ്യനിലയെ ബാധിച്ചതെന്നാണ് റിപ്പോര്‍ട്ടുകള്‍. ബച്ചന് പുറമെ ആമീര്‍ ഖാനും, കത്രീന കൈഫും, ഫാത്തിമ സനഖാനും ചിത്രത്തിലുണ്ട്.
