മാഡ്രിഡ്: സ്പാനിഷ് ഫുട്‌ബോളിലെ 2015-2016 സീസണിലെ ആദ്യ എല്‍ ക്ലാസിക്കോയില്‍ ബാഴ്‌സലോണയ്ക്ക് തകര്‍പ്പന്‍ ജയം. ബാഴ്‌സ എതിരില്ലാത്ത നാല് ഗോളിന് റയല്‍ മാഡ്രിഡിനെ തകര്‍ത്തു. ബാഴ്‌സയ്ക്കായി സുവാരസ് ഇരട്ട ഗോള്‍ നേടിയപ്പോള്‍ നെയ്മറും ഇനിയേസ്റ്റയും ഓരോ ഗോള്‍ വീതമടിച്ചു.
സ്വന്തം തട്ടകത്തില്‍ ആക്രമിച്ചു തുടങ്ങിയ റയലിനെ ഞെട്ടിച്ച് പതിനൊന്നാം മിനിറ്റില്‍ സുവാരസിലൂടെയാണ് ബാഴ്‌സ മുന്നിലെത്തി. ആദ്യ പകുതി അവസാനിക്കും മുമ്പേ നെയ്മര്‍ ബാഴ്‌സയുടെ രണ്ടാം ഗോള്‍ കണ്ടെത്തി.
ചിരവൈരികള്‍ക്ക് എതിരായ മത്സരത്തിലെ ജയത്തിനൊപ്പം സൂപ്പര്‍ താരം മെസ്സി തിരിച്ചെത്തിയതും ബാഴ്‌സയ്ക്ക് ആത്മവിശ്വാസം നല്‍കി. പരിക്കു മൂലം രണ്ടു മാസമായി കളത്തിലിറങ്ങാതിരുന്ന മെസ്സിയെ 57ാം മിനിറ്റിലാണ് കോച്ച് ലൂയിസ് എന്റിക്വെ കളത്തിലിറക്കിയത്. ജയത്തോടെ പോയന്റ് പട്ടികയില്‍ ഒന്നാം സ്ഥാനത്തുള്ള ബാഴ്‌സ കിരീടത്തോട് ഒരുപടി കൂടി അടുത്തു. 30 പോയന്റാണ് ബാഴ്‌സയ്ക്കുള്ളത്. 24 പോയന്റുള്ള റയല്‍ രണ്ടാം സ്ഥാനത്താണ്.
