ടെലിവിഷനില്‍ പ്രിയങ്കരനും, ഹാസ്യതാരവുമൊക്കെയായ എലന്‍ ഡെജനേറൊ 86ാമത് വാര്‍ഷിക അക്കാദമി അവാര്‍ഡില്‍ എടുത്ത സെല്‍ഫി ഏറ്റവും അധികം റീട്വീട്ട് ചെയ്ത ഫോട്ടോ എന്ന റെക്കോര്‍ഡ് സ്വന്തമാക്കിയിരുന്നു. 2014ല്‍ നിരവധി താരങ്ങള്‍ക്കൊപ്പം എടുത്ത ഈ ഫോട്ടോ അരമണിക്കൂറിനകം റീട്വീറ്റ് ചെയ്തത് 7,79,295 പേരോളമാണ്. എന്നാല്‍ ഈ റെക്കോര്‍ഡും മറികടക്കുകയാണ് ബോളിവുഡില്‍ കഴിഞ്ഞ ദിവസം എടുത്ത ഒരു സെല്‍ഫി. ഇസ്രയേലി പ്രധാനമന്ത്രിയ്‌ക്കൊപ്പം ബോളിവുഡ് താരങ്ങള്‍ എടുത്ത ഫോട്ടോയാണ് ഇത്തരത്തില്‍ വൈറലായി മാറിയിരിക്കുന്നത്.
ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു ഇന്ത്യ സഞ്ചരിക്കുവാന്‍ എത്തിയതും, അദ്ദേഹത്തിന്റെ ഇന്ത്യയിലെ ഓരോ ദിവസങ്ങളും വാര്‍ത്തകളായിരുന്നു. എന്നാല്‍ സിനിമാ ലോകം ചര്‍ച്ചയാക്കിയിരിക്കുന്നത് അദ്ദേഹത്തോടൊപ്പം ബോളിവുഡ് താരങ്ങള്‍ എടുത്ത സെല്‍ഫിയാണ്. നിരവധി ആളുകളാണ് ഇതിനോടകം സെല്‍ഫി കണ്ടു കഴിഞ്ഞത്.
മുംബൈയില്‍ കഴിഞ്ഞ ദിവസമാണ് നെതന്യാഹുവിനൊപ്പം ബോളിവുഡ് നടന്മാരും, സിനിമാ നിര്‍മ്മാതാക്കളും സെല്‍ഫി എടുത്തത്. അമിതാഭ് ബച്ചന്‍, മകന്‍ അഭിഷേക് ബച്ചന്‍,മരുമകള്‍ ഐശ്വര്യ റായ്, സെന്‍സര്‍ബോര്‍ഡ് ചെയര്‍മാന്‍ പ്രസൂണ്‍ ജോഷി, സിനിമാ നിര്‍മ്മാതാവ് ഇംത്യാസ് അലി, മധൂര്‍ ഭണ്ഡാര്‍ക്കര്‍, കരണ്‍ ജോഹര്‍ തുടങ്ങിയവരെല്ലാം സെല്‍ഫിയിലുണ്ട്.
