മമ്മൂട്ടിയെ നായകനാക്കി അമല്‍ നീരദ് സംവിധാനം ചെയ്ത ചിത്രമാണ് ബിഗ് ബി. 2007ല്‍ പുറത്തിറങ്ങിയ ചിത്രത്തിന് മികച്ച വിജയം സ്വന്തമാക്കാന്‍ സാധിച്ചു. ബിഗ് ബിയുടെ രണ്ടാംഭാഗം അമല്‍ നീരദ് ബിലാല്‍ എന്ന പേരില്‍ പ്രഖ്യാപിച്ചിട്ട് നാളേറെയായി. ഇപ്പോഴിതാ ബിലാലിന്റെ ചിത്രീകരണം ഉടന്‍ ആരംഭിക്കുമെന്ന വാര്‍ത്തയാണ് പുറത്തുവരുന്നത്.
നിലവില്‍ പ്രീ പ്രൊഡക്ഷന്‍ ജോലികളിലുള്ള ബിലാല്‍ മാര്‍ച്ചില്‍ തന്നെ ചിത്രീകരിക്കുമെന്നാണ് റിപ്പോര്‍ട്ട്. ചിത്രത്തില്‍ ഒരു പ്രധാന വേഷത്തില്‍ മംമ്ത മോഹന്‍ദാസും അഭിനയിക്കുന്നുണ്ട്. ചിത്രത്തിനായി തയ്യാറെടുക്കുന്ന കാര്യം ചലച്ചിത്ര നടന്‍ ബാലയും തുറന്നു പറഞ്ഞിരുന്നു.
മമ്മൂട്ടിക്കൊപ്പം ഫഹദ് ഫാസില്‍, ശ്രീനാഥ് ഭാസി എന്നിങ്ങനെ വലിയ താരനിര ചിത്രത്തില്‍ ഉണ്ടാവുമെന്നും റിപ്പോര്‍ട്ടുകളുണ്ട്. സംസ്ഥാനത്തെ കോവിഡ് 19 ഭീതിയുടെ പശ്ചാത്തലത്തില്‍ സിനിമയുടെ ചിത്രീകരണം നീളുമോ എന്ന കാര്യവും സംശയമാണ്.
